اجمل اشعار الشاعر الكبير ايهاب المالكي

ما ردت احبك حاولت .. من لفظة اسمك حاذرت
جلمة وشلتها من الحجي
ومن اللسان اخفيتها
وبيبان روحي مسددة .. وعن لا احب سديتها
صلفة امنياتي الرادتك
سألتني عنك ..؟ بس صمت كلش ولا حاجيتها
كالتلي وينه وجاوبت ما ادري ما دليتها
ماردت احس حبك لان كبلك الروح انطيتها
ولخاطرك رحت اعتذر .. منيت بيها لخاطرك
مثل الطفل لمن يمن بحاجته
وياك اعز ناس انتهو ما عدت احس بعازته
ابدربي كلت لو مو سوى وامشي حياتي بلا درب
يمكن يشح عني الهوى ..لا ..! بس جذب
معقولة ما نمشي سوى
معقولة في لحظة الشمس للكاع ما تنطي ضوى
وتنتهي وما نلكى صبح
معقولة يطلعلي جرح
معقولة ريشة شفتك ترسملي بالضحكة رمح
لا مو صدك ..! خلينا من هذا الحجي
بجفوني سولة عالبجي
وصياد كاعد بالجفن شايل فالته
وياي جن حبك صرت مثل الهلال وهالته
كالولك يعوفك تره تذكر كبل كتلي شكلهم
كتلك اي
كلهم لمن تمشي من يمي جنازته
هو انه عايشلك لان دمي الاعز ما بالجسم
بس انته التعرف حالته
من ما يحس بلمستك يخلص وتبقى وشالته
تذكر جنت من تعتنيلي بلهفتك مشتاك حتى تشوفني
وتلكاني روحي مشككه ولمسات اديك تروفني
تتركني هسه قررت
ينطيك كلبك ننتهي وبس بالاحلام تشوفني
تتركني هيج بلا ذنب
بررلي حتى لو جذب
مليت كلي كمت امل
شيحمله ليلي بوحدتي
ما ينحمل بعدك تره
وجذبت كتلك ينحمل
كتلك لمن تمشي تره تتركني وحدي جن طفل تايه
وكل اهله مشو عايش يتاني الما اجو
كلشي اليمر يفززه
حتى الشماته تفززه
من يمشي ويهب الهوى يلتفت حسباله حجو
لكن لمن يذكرك حتى الشماته الما بجو من شافو دموعه بجو
هيجي انه من عني رحت ما تسكت جروحي ولو
دورتك انه بشدتي شفتك وطن حنيت الك
لكن لكيتك غربتي احتاريت من ياهي صح
ما بين ذلي وعزتي
اختاريت اعوفك حتى لا ..
تكسر قرارك دمعتي
ونيت سكته ما ردت يشمتون بونتي
صح اضحك بنبرة فرح بس ركز بصوتي بعد
تسمع نحيب بضحكتي
هم مثلي كلبك ما نسه
وهم من تمشي بدرب تذكرني خطواتك بعد
تترك فراغ لخطوتي
لا تسكت الا بينت بين اثرها بعبرتي
ولا تلتفتلي بس ردت انطيك اخر ما بقى وهو شبقى
بقت دمعات ليك بذمتي