مكتبة الابوذيات 1

من طرف **admin** الإثنين مارس 21, 2011 3:26 am

مكتبة الابوذيات
الشعر الشعبي العراقي - اشعار شعبية

السلام عليكم
اليوم حبيت انزل هل الموضوع وهوه عباره عن مكتبه للابوذيات

مكتبــــــة الأبوذيــــــات

على راسي اعتني بيتك واجيلك
لأن بس انته أحترمك واجلك
حسنك منوجد بهلك وجيلك
وعبرته ليوسف بحسنك شوية
==============
إلك بس انته هل دمعي والك صاب
والك ساس بوسط روحي والك صب
سهم هجرك دخل گلبي ولك صاب
دليلي وصار طشاره بدية
==============
بغيابك تيهت صومي والامساك
وصباحك مايكفيني ولا مساك
ألف هنيالي اذا شمك ولمساك
واطفي بشمتك نار اللي بية
==============
يجزعك لاتظن گلبي ويملاك
وجمالك منوجد مثله ويملاك
لون مال انجمع عندي ويملاك
وبدونك فلس مايسون إلية
==============
أحلفنك تگلي الصدﮒ بالله
منو مثلي بچه والثوب بالله
فراگك زيدالي الطين بله
وفوﮒ اهموم حط اهموم بية
==============
ابلهيب الشوﮒ كل اعظاي وجن
وتيهت السنين المضن والجن
مثلك ماشفت بالإنس والجن
جلت قدرته السواك الية
==============
شلون اتخون وانته احلفت بايات
مزلاگه اطلعت مو درج بايات
تريد اتروح مو بس باي بايات
واليرجع ألف نعله اعله ابية
==============
تدري اشگد الك گلبي ولع ظام
زغار اجروحي يهونك والعظام
أموتن واندفن واعتگ والعظام
يزحفلك زحف لو صحت الية
==============
أگوم اجلالا لحسنك وقف لك
واسجل گلبي ياخلي وقف لك
وحطك بي وقفلنه وقفلك
وطب بصدري واقفلكم علية
==============
فال الخير مامره فوالي
وحبك شحن دلالي فوالي
إذا ماعاجبك فاشطح فولي
بس بشرط خنولي سوية
==============
الدنيه ألف صورة لاقطلها
وابد ماصرت ثعلب لاقط الها
أنه اقلامي اتركتها لاقط الها
شكتب بعد مايقرون بية
==============
شعجب دفتر عشگنه ماتگلبه
وليش انته اليگلبك ماتگلبه
أنه گلبي بغيابك مات گلبه
گلب گلبي توفه وعم عليه
==============
بسهم حبك دليلي اليوم ينصاب
والك تمثال نص الگلب ينصب
واذا گلبك عليه ايريد ينصب
أحب نصبك ولك أنصب عليه
==============
بچيت وسال دمع العين وشل
وبعدك من يتچي الحمل وشل
إنته اللي تخيط الفتگ وشل
الدهر خوان ماخلاك اليه
==============
عيني لو بچت ياگلب خلها
بسبب چي رحل من الدار خلها
افراگه كل جميع اعضاي خلها
على خوي الرحل وابعد عليه
==============
حميتك دافعت عنك ورحماك
الطعن أهون ولا لوذن وره احماك
گلت أوليك ماعوفك ورحماك
وليت وطيبتي عمت عليه
==============
طبعك مو شجي وگتلك شجاني
شجنيت اوياك شو گلي شجاني
أمس چنت انحظن وانشم شجاني
گنفذ والحظن حسرة عليه
==============
تعال احسب اهمومي عده انته
وگلبي اشعنده غيرك عنده انته
أزعل الناس كلها عده إنته
لأن زعلك يزعلني عليه
==============
ساعة الوكت مشراگه سعافاي
وعليه اليوم ماتلحگ سعافاي
چنت نخلة ويفيلهم سعافاي
وعلى گرصة خبز چيموا بيه
==============
چنت ظهره بوكت عوزه وسده
وعليه اليوم صك بابه وسده
شجاه الچنت اله مخده وسده
عله بايه وبده ايشمر عليه
==============
يالبهمك املابس لابستني
وثوب الحزن بيدك لبستني
رحت لاصالحتني ولابستني
ولا گتلي چذب حقك عليه
==============
دكافي امن البعد ياترف بس بس
ومنو البذنك على الهجران بس بس
گبل تركض تجي لو صحت بس بس
شجاك شغيرك هسه علية
==============
العمر ماي وتبده كلف لمه
وعلي نكبات هجرك صفت لمة
گتله شوكت تفرح گال لمه
أشوف اجنازتك تمرﮒ علية
==============
أريد الزم خديدك واشتمنه
واريد العن ابيك واشتمنه
تدري شراد گلبي واشتمنه
على صدرك أموت وهاي هيه
==============
أطلبه وإجه وفاني سوادين
شدهني وصارن براسي سوادين
يحگلي احزن عليك البس سوادين
الوجه والثوب أصبغهن سويه
==============
ساعة الوكت مشراگة سعافي
وعلي بجفاك ماتلحگ سعافي
چنت نخلة ويفيلهم سعافي
وعلى گرصة خبز چيموا بية
==============
البشر معدن تعرفه بيوم ينحاك
يوم التوگع ومكسور ينحاك
علي خيط المصايب گام ينحاك
والتكتلك أخوي الحاكه اليه
==============
ارضعتني الدنية همها من نهدها
طحت والطيحة طيحة من نهدها
والله بصدري حسرة من اهدها
أبچي المن صخر گلبه عليه
==============
بدمع عيني اكتبتلك خاطر آنه
والك مايوم كاسر خاطر آنه
غير انته تجيني خاطر آنه
أجيلك معتني ازحوف اعله اديه
==============
أوعي بالظماير ردت يوعان
طحت ماشفت منهم گام يوعان
بدي وكلت اخوي الچان يوعان
مسح حلگه بقميصي وعض اديه
==============
أنه المايوم خله اوياك خليت
شجاك وبالظهر سچين خليت
شعندي وشبعد ياترف خليت
صفه حته البدي هم موش اليه
==============
وحگ القاب والقوسين ودنه
لغيرك مايلف ويدور ودنه
أگربلك ردت بخطاي ودنه
لاچن تبتعد عني برديه
==============
أشد حيلي ويبيد ابساع وانحل
تعب جسمي وهلك بالظيم وانحل
يسادس درس يمته اتروح وانحل
أخاف اتأخر ويزعل عليه
==============
أريد اصعد جبل حمرين وارگه
ودز ويه الهوه للولف ورگه
شوكت ماخضرت بالملح ورگه
لذاك اليوم بلكي اتعود اليه
==============
أبوذيات گمت اكتب عليهم
وگولن مثله لخضير عليهم
گلبي اليوم بي هم وعليه هم
ولاتنفع اهمومي الأبوذية
==============
رسم يوم الهجر بيده وخاطه
الحزن فصل علي ثوبه وخاطه
مزج مر الهوه بدمعي وخاطه
وسگاني وماعطف أبدا عليه
==============
فتح باب الگلب ولفي وطبله
ولجل اقدومه دﮒ عوده وطبله
احترمته وقدمت چايي وطبله
إله لاچن يعاوضني بأذيه
==============
تعبت من المسير وبعد مامش
ولون هلت عيوني اعليك مامش
صرت مثل اليدور عله الماش
اشما أتعب وأركض هيه هيه
==============
حبيبي امن انسجمنه روح وي روح
إلي اشگد طيبت چويات ويروح
امن اذكرك كله همي ايزول وايروح
وهلال العيد من تگبل عليه
==============
وحگ سورة بره وياسين ونسه
وعگبك مابگالي بعد ونسه
عمت عيني امن ابطل ابچاي وانسه
لما الأبيض يگدرونه عليه
==============
شحلات الترف من يامر وينها
وحسنه خبل الوادم وينها
يناظر لو تره مثلي وينها
وعلي چان انكسر گلبك عليه
==============
ربعك ناحت ونصبت عزلها
لأن عنك حكم دهرك عزلها
إنته الچنت للوادم عز الها
افگدوك وظلت اديارك خليه
==============
منو منكم عليه نشد من سال
جفيتوا وبجفاكم صرت منسال
شعندي غير دمع العين من سال
أخفف بي مصابي الصار بيه
==============
عجب للحين عندي اعيون يارن
ولابطل دمعهن دوم يارن
ايعين الله دليلي حمل يارن
الدهر واطبگ جفه احبابي عليه
==============
يغايب غيبتك طالت على اهلاك
وغدو كل اليحبونك على اهلاك
يگلبي ضل ولاتبطل على اهلاك
لمن للگبر يسرون بيه
==============
افراﮒ الترف للدلال علة
جفاني وخله وسط الگلب علة
على هجر الحبيب اصطبر عله
يعود وترجع ايامي الهنية
==============
حبيبي خوش اله وجنة وشامة
بموصل منوجد مثله وشامه
عونه اللي لمس خده وشمه
تحيى الروح وايشوف الهنية
==============
حبيبي بسك امن العتب واللوم
زعلت وأذه زعلك گلبي واللم
تعال وخلي نجمع حبنه واللم
تره افراگك بده ايطول عليه
==============
طبيب الروح ماتدري شبيها
سگمها البالحسن يوسف شبيها
خفي نيران هجرانه شبيها
بچبدي او لايفيد ادواك بيه
==============
بعد متفيد حسراتي وندماي
راح الچان الي ونسه وندماي
خضاب الناس بالحنه وانه ادماي
خضابي وصار من عيني لديه
==============
أحله من العسل خدك وشافاك
وهنياله والوصل دارك وشافك
طبيب اجروح تدريني وشافيك
وجرحك ماأظن يصعب عليه
==============
جمعله اچم فلس بيها تراها
أعمه الگلب بس عينه تراها
ثروه بدون طيب وحب تراها
مذله وفگر واجيب الأذيه
==============
على دهري چنت آمر واگوده
ولناره اصبحت هسه وگوده
چنت بيدي الزم الجاهل واگوده
وهسه يگودني الجاهل بديه
==============
أحس گلبك عليه اليوم لاعب
وكلامك خشن بطله اوياي لا عيب
شجاني اتورطت حبيت لاعب
تركني وفضل الطوبه عليه
==============
گلب صافي لون تهوه گلبنه
وابد مايوم عالصاحب گلبنه
إحنه اظلوع الك وانته گلبنه
ونحافظ عالگلب من كل أذيه
==============
صديقي أشگد وفي ومخلص وصادق
واحبك ماأحب غيرك واصادق
نخيت الهادي والباقر وصادق
تظل انته أعز محبوب اليه
==============
حبيبي بس الك هالگلب وايميل
وعالفرگه ايتموج دمعي وايميل
ماطالب رسالة ادزلي وايميل
فرد مسكول لاتبخل عليه
==============
مفارﮒ والليالي اسنين مرن
وعلي صاير لذيذ الزاد مرن
طفر گلبي على النقال من رن
لأن حسيت روحي ادﮒ عليه
==============
وحگ الألف واللامين والها
روحي بهوى ساهي العين ولها
لها ثغر وجبين وعين والها
خد شبه البدر لو سطع ضيه
==============
فصوص العين فص يمي وفص لك
لأن من يوسف انته اصلك وفصلك
أخيطك بيدي تدريني وفصلك
واجيبك فيت عالطول العليه
==============
خلبص والعب بكيفك وشربك
وبان الغيض بعيونك وشربيك
أجرعك لوچنت حنظل واشربك
وأحبك لو چنت چتال اليه
==============
عزيز انته والك بالروح منصب
ودمع العين من فرگاك منصب
عسى موتي جريب وگبري من صب
ولا أسمع خبر عنك أذيه
==============
أريد اخبط مزيج الرمل والحر
وادور عالصديج الوفي والحر
نخيت الله وابو الحسنين والحر
يحفظ كل خوي يذكر خويه
==============
تراچي من الذهب لابس وساعة
وقميصه امن الخصر مابي وساعه
ساعة اينام المدلل وساعة
يفز مرعوب ريته ابين اديه
==============
أحترﮒ گلبي بسعيرك والتهابك
وترك هالناس كلها ولتهابك
اشسبب روحي التودك والتهابك
تفارگها وتشب نيران بيه
==============
وحگ من صله بالمسجد والاكبر
اشكثر باريتك بجبي ولك بار
چبيرة سوايتك هايه والاكبر
تصيرن إنته والشامت عليه
==============
سبحانه الخلق حسنه ورقته
وكلامه العذب داواني ورقته
تمنيت بكتابه اصبح ورقته
وكل ساعة يحط عينه عليه
==============
شوصفه بياشعر يرهم وگصه
علي من فات گلبي بموس گصه
شنو التسريحة لبشعره وگصه
تهد الحيل ابد مو طبيعية
==============
أنه المديون والتمو طلابه
اوكته استاد ويحاسب طلابه
شجاه الموت طالبنه طلابه
ترسها اگبور أرض البابلية
==============
بمحبتك ماأميز الشمس من في
وبنظرات عينك صرت منفي
دمد ايدك بگلبي وشوف من فيه
واذا غيرك لگيت اعتب عليه
==============
مرتاحين واحسن عيشه چنه
وهسه بقهر لمن جنته چنه
مو چنه الإجتني أتگول چنه
إبليس الإجاني وعم عليه
==============
الدهر للحزن من ايدي يراني
ولا واحد وگفلي من يراني
كلمن صد الي بنظرة يراني
خاوي الجسم بس الجلد بيه
==============
أنه الصياد صادتني شبكتك
ودخيل الله اشكثر حلوه شبگتك
أدﮒ اعليك مشغولة شبكتك
واظن مغلق جهازك بس عليه
==============
حياتي انتي ومهجتي وإنتي گلبي
وحزني بشوفتچ ينقص وگل بي
إلزمي وفتشي ادليلي وگلبيه
وغير اسمچ فلا تلگين بيه
==============
صرت من بعده منفي بوسط وادي
وجريح اصبحت أنزف بحر وادي
شودك لو تگلي اتمنه ودي
طلب واحد أشوفه وهاي هيه
==============
يچكليته بطعم خدك يبسكوت
عليك ابليلي صدﮒ أون بسكوت
جبت كيه وگمت أشتغل بس كوت
إلك بس انته والكروه عليه
==============
وحگ مكة وشبل حيدر وموسى
الهوه تذبح سچاچينه وموسى
لون ولفي مسك جرحي ومسه
إيده البنسلين اتصير اليه
==============
سبع اظلوع يوم اهجرت حنيت
بهجرك لاتظن لچفوف حنيت
تصد عني ولعد الغير حنيت
وبعد تعبي تجازيني برديه
==============
بلانه الله بلوه بسمراني
وغرامه بوسط گلبي بسمراني
حلو ماضگت منه بس مر آني
واحسه امن العسل أطيب شويه
==============
يالمسيطر عليه دومن انته
اشما نلعب الفايز دومن انته
شش بيدي وتگلي دومن انته
شدومن وانته قافلها عليه
==============
تعالولي يربعي فكروني
الأحبنهم نسوني فكروني
إذا ام كلثوم غنت فكروني
شحطلها وترد ترهم عليه
==============
حبيبي اسمك بعيني انحفر وانخاط
وگلبك ويه گلبي انطبگ وانخاط
أحس دمك بدمي أختلط وانخاط
واحس مو روحي روحك تسري بيه
==============
حبيبي لاتظل محتار أوشاك
الوشالك بيه عندي اليوم أوشاك
تعال اهواك اهو عالموت أوشك
تعال ومن تجي ترد روحي ليه
==============
الجرح خزن يحلو الطول وده
يبيك الگلب زاد اوكثر وده
رسمك ياشريچ العگل وده
إلي تذكار من تبعد عليه
==============
احترﮒ جوفي بلهيب الحب ويغله
وغرام الترف چتفني ويغله
الذهب طبع الذهب يرخص ويغله
وحبيبي بكل وكت غالي عليه
==============
هنا يالچنت مني وچنت مناك
وعلي منيت وآنه اقبلت مناك
عزيز وليش دربك صار مناك
قروا بذنك تريد اتخون بيه
==============
يعلمني زماني ادورس وانسه
وعلى حالي بچت رضعان وانسه
آنه الچنت للخلان ونسه
صرت مكروه محد يمر بيه
==============
الليالي لاتظن ياصاح طابن
بصميم احشاي الك نبلات طبن
احملت منك چثير اجروح طابن
لچن جرح الكلام اثر عليه
==============
ظهري مال چالحاجب وحن ليك
ومسحت المدمع بچفي وحن ليك
مثل يعگوب اون وانحب واحن ليك
ومثل يوسف وصالك شح عليه
==============
أبد ماشفت من الدنية ود لي
نشفت گهوتي امن العوز ودلي
إذا عندك شوية صبر ودلي
أكمل عيشتي الكلها رديه
==============
العمر ضاع بهواك ونقص مازاد
وحچيك بس وعد عن هذا مازاد
أنه البيه زماني صاح مازاد
والف شراي يتعامل عليه
==============
اشبده مني وشخصك على ماطل
وحبل امواصلك وياي ماطل
دليلي اويه الصبر بجفاك ماطل
مثل روحي التماطل بالمنيه
==============
حبيبي العمر بعدك كلفاني
طحت والموت اشوفه كلفاني
ثمن هجرك حياتي كلفاني
دفعته وإنته تتحمل خطيه
==============
حبك مرض بيه منعاني
طرحني وعن وصالك منعاني
ماهزك الناعي من نعاني
ولانعشي كسر گلبك عليه
==============
حبيبي بدربه صدلي ولاحظاني
لكن ماگربلي ولاحظني
بخت ماعندي بالحب لاحظ آني
جبتها اصفارة ماحصلت ميه
==============
عليله الروح ماريدن طب الها
وحسافه الشامت لدارك طب الها
شجاك الدنية دگتلك طبلها
وصفت نسوان لتوزك عليه
==============
وحگ بيت التطوف الناس حوله
الفرح بگليبي ابد مادار حوله
طحت بمره وچنها ابليس حوله
وعدها السان شاعل والديه
==============
سدرة امي وفيي من سدرها
ورضعت الطيب والحب من سدرها
أبد منسه حظنها ومنسه درها
ولا أنسه اشكثر تعبت عليه
==============
100
عگب جرحك يدهري وشتلمني
مثل ماي وتطشر وشتلمني
يوكتي اللوم كافي وشتلمني
تلوم ازغار عيشتها رديه
==============
الحاقد حرض الوادم علي داس
اوكتي اشلون حطمني وعلي داس
لعب داس وگلت أوگف علي داس
غلبته وضحك الوادم عليه
==============
گلبي بنارة مايلهب ولاشاب
وشعري المايصير ابيض ولاشاب
لاعمري چبير آنه ولاشاب
عمري سبعطعش عشت بأذيه
==============
على افراﮒ المحب أعتب ولاميت
واداوي اجروحي لبگلبي ولاميت
لاني حي على افراگه ولاميت
بگيت ابحال سكرات المنيه
==============
چفك لايمسني مستحيله
وانه المايستحيلي مستحيله
عشرتي اوياك صارت مستحيله
وانه الممنون اذا تگطع الجيه
==============
يوم الدهر ياصاحب وعانه
وعرفنه اللا فلس ينفع وعانه
أخوي المانگل حملي وعانه
إلي شيفيد لو تدنه المنيه
==============
گلبي اگبال طولك حيل رباك
والرباك مدري اشلون رباك
من ياطين خدك سوه رباك
گبل يوسف إلك أنطه اولويه
==============
طيب ازرعت لحبابي ولازال
وعزهم من يلاگوني ولازل
حبهم ساكن بگلبي ولازال
وشنو الأسباب مامروا عليه
==============
ايتهجه احروف علمته وقربيه
ونكرني ومارضه بوصلي وقربي
أدور ياذنب عندي وقربيه
لگيت الطيب أكبر ذنب اليه
==============
وحگ عينك وحگ جفنك ورمشاك
أظل طول العمر أمشي وره امشاك
منك بالگلب عندي ورم شاك
واطيبن من تخلي ايدك عليه
==============
جرح أنزف وخوتي ماشلوني
الذهب لوني وگلهم ماشلوني
طحت يمهم حسافه ماشلوني
توچيت اعله روحي وگمت بيه
==============
وين الأخو العاوني على الراح
ايتفرج والگلب خلوه على الراح
خلصت العمر أصفج على الراح
من اخوتي الشمتوا عدوان اليه
==============
خفي جرحي ولامن محب حسبه
أگضي الليل حسبه بأثر حسبه
خلص عمري تعال اوياي حسبه
وحرام انچان مر الفرح بيه
==============
جروح الگلب فوﮒ الملح شرهن
وعلي طشن ليالي الظيم شرهن
حرت آنه شبيعن بعد شرهن
بگه ثوب الشرف ساتر عليه
==============
الليالي بهجرك اشتركن وسهمن
وگبل چان الدمع جامد وسهمن
جمرتين بوسط روحي وسهمين
عفاني شلون شايلهن سويه
==============
عليه اهموم وزنه والف وزنه
وكلامي التسمعه بتفكير وزنه
ألف واشي عليك اليوم وزنه
والف يمك يوزونك عليه
==============
نهتم بيك لنك منتمنه
واذا تنكر حبيبي منته منه
إحنه اخلاف شخصك منتمنه
وبعد منريد من رب البريه
==============
حسافه الچان الي مصبح ولي ماس
لن بلسانه يطعني ولي ماس
وردة وبيد عدواني ولي ماس
يحز برگبتي ويگطع بديه
==============
إلي يومين عن الزاد مساك
يالماجيتني ولاگلت مساك
أجن وازعل لون الريح مساك
وتشل حالي لون تبعد عليه
==============
وحگ ذي قار والموصل ورطبه
بميك ياوطن گلبي ورطبه
نخلك ياوطن وينه ورطبه
يرد سعفات بس ضلن عليه
==============
هاسل الگلب بجفاك هامات
ويامه اگبال سيفي انحنت هامات
أخبرك روحي نص الليل هامت
عليك وسحل جابتني من اديه
==============
حلاوة وطيب للياگل تمرنه
ويضل نافذ كلامك من تمرنه
تميل البصرة كلها من تمرنه
والك شط العرب ياخذ تحيه
==============
ترف ومن الورد اترف ترافاك
والذ من العسل واطيب ترافاك
تعال اگليبي الك بابه ترافاك
أسده ويفتحك غصبن عليه
==============
إلآهك من خلق حسنك نصف بيك
وحرنه بياوصف گلي نصف بيك
طلع هذا الگمر ماخذ نصف بيك
واسمعه ايگول خل يصعد عليه
==============
لون يدري الزمان اتموت چادار
ومن صدره علينه اهموم چادار
عگب ذاك المضيف النصب چادار
ومصابك بالگلب أثر عليه
==============
شفت بس الذهب يرهم وصف لك
ولحط كهرب على ارگبتك وصف لك
حبيبي ابروحي مدرستك وصف لك
وعلى گلبي رحلتك ذيچ هيه
==============
يصاحب لو تشوف اشلون كتماي
على اعيوني يصب الدمع كتماي
اشمگل الروح سر الهوه كتماي
تحن وتهيج الساكن عليه
==============
اجروحي اتحرشن بيه وعالن
وانه الماكاشف اهمومي وعالن
بحلات النوم فز گلبي وعه لن
أخوتي وربعي اجو چتال اليه
==============
أدين الروح والصاحب مدينه
وحبال الوصل لليگطع مدينه
حسبت ابيوت صدگاني مدينه
وبتت بالچول خاف اتمن عليه
==============
لغيرك لاجره دمعي ولاهل
غاب الگمر من شافك ولاهل
لالي احباب بالدنيه ولاهل
بس انته وگطعت الوصل بيه
==============
حبيبي بوسه منك طالباني
وعليمن گلبك اشبيه طالباني
وين الله واصيرن طالباني
شحلات الحله اذا نمشي سويه
==============
حبيبي امن العتب أرجوك بس بس
ومنو البذنك يبعد الروح بس بس
إذا عندك العشرة اتريد بس بس
تعال وتنتهي كل القضيه
==============
أفن من زماني وآه منه
على من چان الي وياه منه
أگله الدرب هذا ايگول منه
أگله فوت بي يرجع عليه
==============
أبد مو عالبشر يجري جرالي
وعلى خدي نهر شوگي جرالي
ولك گلبي شرد مني جرالي
من الياخه دجره وجيبه ليه
==============
أصافح إيد شماتك واعاديك
لأنك ماصنت مرة وعاديك
تضل تغلط واصححلك واعاديك
تعاند ماصفه گلبك عليه
==============
حبيبي ايلوﮒ شعرك من تحله
غزال وكون ولفي منتحله
اشجابك عالسماوة منته حله
الحلاوة البيك أصلا بابليه
==============
اهجرتني بلا ذنب ومشيت عناي
وظل الگلب بس اينوح عناي
لون ارتاح چنت اوصلك عناي
واخبرك بالفراﮒ اشعمل بيه
==============
حبيبي الگلب لودادك تره حن
بشبابي وظهري من هجرك تره حن
رحيل اليوم لو باچر تره حن
حرام بشوفتك تبخل عليه
==============
رضاة الله أمي مرضاها
ولاحب مثل حبها مرضاها
الوكت وارباي والهم مرضاها
مريضة ومن اون اتون عليه
==============
شتلت وطلع وسط النار شتلي
وزماني اشكثر يامه اخوان شتلي
عليهم شقره من آيات شتلي
دخلي الفاتحة اقراها عليه
==============
زرعنه انته وثمرنه وانته حبنه
فگدناك وبچينه ونتحبنه
دگوم اگعد نحبك وانته حبنه
نشوفك فرد مرة وهاي هيه
==============
نصبت ومانفع نصبي وشبچي
ودمع العين وشلته وشبچي
يدنيه لملمي اهمومچ وشبچي
وخلي اشما يصير ايصير بيه
==============
اشمگل الروح اصبري اتگول لامات
وعلي اهلي وجميع الناس لامات
الرجل يخلف وراه اثنين لومات
ثوب وخلق عالي لهالبرية
==============
يروحي اللي تحبينه ولچ مات
نزل جوه الأرض جسمه ولچ مات
إحملي الظيم من بعده ولچمات
وشوفي اشضامتلچ هالدنيه
==============
شكيت الحال للطيبين مرات
وگمت امضغ احروف الصبر مرات
يمن ريت الزمان ايعود مرات
وارجع للجره والصار بيه
==============
حبيبي الگمر وجهك من تطلبه
والك يرخص گليبي من تطلبه
غيابك سل يسلني من تطلبه
وكل ساعة المرض يشتد عليه
==============
تره گلبي انترس لجلك من الهم
وغيري ابكثر ماودك من الهم
ردت خلوه ولك أشكي من الهم
لأن يرتاح گلبي من الأذيه
==============
كل الناس صفحة وانته صفحة
وحياتي اكتاب بيدك وانته صفحة
اليصافح مدله چفك وانته صفحة
وتكبر عاليدورلك رديه
==============
ليش اعله التكبر دوم تسعه
نسيت ابساع كلنه ولد تسعه
عندك جنح واحد موش تسعه
تريد ابتك جنح تعله عليه
==============
الليالي للأحبهم صدﮒ شتان
وعليه الصيف لا يالولد شتان
تعال انته بغربتك بعد شتان
طحت آنه الوكت دﮒ حيل بيه
==============
ظعن حبي نوه بهجره وعلي سار
أصب الدمع والواشي علي سار
بقيت آنه اطبگ اليمنه علي سار
على ولفي الهجرني وخان بيه
==============
لغيرك مايسل دمعي ولك سال
وعليك الگلب ماتدري ولك سال
يخايب يابعد روحي ولك سال
اتركتني ومادريت الصار بيه
==============
أزرع ورد واحصد شوك واجني
وغرامك بالف لهبة نار وجني
يقاسي الگلب دمعي جرح وجني
ولانوبه عطف گلبك عليه
==============
روحي معلگه بحبك بعدها
لكن هالزمن عنك بعدها
يخوي اسأل علي مره بعدها
ميهمني الحصل والصار بيه
==============
شوصفك والوصف محتار وصفه
وجمالك أنقه من الذهب وصفه
عليمن يكتب الدكتور وصفه
دواي انته وشفافك صيدليه
==============
يگلبي ابيش اخيطنك ولحماك
ولاواحد وگف دونك ولحماك
إجاك الظيم من دمك ولحماك
وبدال الطيب جازوك برديه
==============
اذكرنه ياحنين الگلب مره
وسويلك على الخلان مره
ليالي اجفاك آه اشكثر مره
طفه بيها الگمر واختنگ ضيه
==============
السكن بالگلب دﮒ اوياي دگه
چنت عنبر أحسبه وطلع دگه
يشامت عاد طبلك حيل دگه
إجت من صالحك ماصار بيه
==============
أضل حزنان عالراحت وماجت
ودموعي اعله طرف العين ماجت
أحس الگاع تحت الجدم ماجت
لمن راحت وغابت عليه
==============
على وجنة حبيبي اثنين شامات
ويريت اشبع گبل ماموت شمات
لون صاروا جميع الناس شمات
أگابل منزله صبح ومسيه
==============
هلن ياجفون العين من دم
على من چان الي وياه مندم
بودادك لو تلفت الروح مندم
أندم لو گطعت الوصل بيه
==============
البدر بخدود حلو الطول وسم
سجني الترف بين الأرض والسم
ومن هجره جرعت الصبر وسم
عفه گلبه الجلد ماحن عليه
==============
خذلني الگال انه عونك وگدها
وعليه اعداي حشمها وگدها
ابچبدي النار وبجوفه وگدها
الأخو الطفيت نيرانه بديه
==============
عگب عينك نشف شطنه ويمنه
وعلامك ماتمر بينه ويمنه
تولاني الدهر يسره ويمنه
وخلاني الصبح ماشوف ضيه
==============
عشت عمري عمر منذور للحب
زارع حبتي وناطور للحب
صفيت آنه مثل ناطور للحب
أود من النگيط امليلي ميه
==============
معجب حيل انه بطبعه وفنه
صادق دوم بوعوده وفي النه
اليمسه بالأذه شحده وفنه
عليه أعلگ الحرب العالمية
==============
دليلي اتفطر بشيلة وظعنه
راح الشوﮒ وتخربط وظعنه
بينه افترت الدنيه وظعنه
وصفينه نعد بيام المنيه
==============
وحگ من بالحشر ربك حياها
ألف ليله انگضت جفني حياها
آنه استحي ويمنعني حياها
السكوت مخيم اعليها وعليه
==============
على گلبي الفرح مايوم عده
ونهاري بشهر مو ساعات عده
زماني اشگد دگايگ سود عده
أفك وحده ويجن عشرة سويه
==============
ابهيمه ياضعن صاحوا وناخوك
وعرفوا گد للمزامط وناخوك
صحت للمنتخي عونك وناخوك
وعد عيناك يالزامطت بيه
==============
فرگتك ياترف گلبك عملها
وعيني لو هوت غيرك عملها
يتيمه الروح واوصالك عمه الها
يخف عني المصاب الصار بيه
==============
علامة الدهر شتتنه وطرنه
عگب ذاك الطرب بالهم وطرنه
ألف ياحيف مگضينه وطرنه
الليالي اللي مضت متعود اليه
==============
هجم حبك على اسنيني غزلها
وروحي بمغزل الحسرة غزلها
القصايد بس الك لايگ غزلها
يبو اشفاف العسل عينك عليه
==============
تغيب الروح بغيابك واردها
وكتاب اجفاك من عندك وردها
روحي بفرگتك ذابل وردها
ماي انته وترد الروح اليه
==============
يصاحب لو لگيت الزين وده
وصير اوياه گلب بگلب وده
اشكثر جاب الزمان اشكثر وده
ولامثلك يمر طيب عليه
==============
شوفني الفراﮒ انجوم ظهري
وگمت للشيبه اگلها ابساع ظهري
ردتك يبني إنته احزام ظهري
ترد العيله لو صارت عليه
==============
أحب كل يوم اشوفك واشتمنك
واذا تبعد أسبك واشتمنك
شوف اشراد گلبي واشتمنك
بوسط عيني فلا تبعد عليه
==============
ليش استعجلت بالسفر ومضيت
وبيدك وقعت عالهجر ومضيت
جمرتك أثرت بالگلب ومضت
ماتطفه لمن ترجع إليه
==============
شحلو طولك من تمشي وناراك
عفه گلبي الحمل ناري وناراك
إذا إنته تعب حيلك أنا رك
عليل اشفه إذا مريت بيه
==============
حبيبي ليش عني ولك هملان
دمع العين عالوجنات هملان
الحديد الماتلينه النار هم لان
واشو گلبك صخر ماحن عليه
==============
لعبرلك حبيبي ابحور وانهار
ولنتظرك يروحي بليل وانهار
واذا ماشوفك آنه احترﮒ وانهار
واوصل گبل موتي للمنيه
==============
الدنيه سيوف بضلوعي سنتها
وقوانين التعب لجلي سنتها
الوادم تحتفل باخر نستها
وانه ابچي اعله العمر راح امن اديه
==============
الوادم تنظر لجسمي يروحاي
وانه اموتاتني سكتة يروحاي
شمالچ بالعجل طحتي يروحي
خلص صبرﭺ يروحي وخنتي بيه
==============
حگه الدمع فوﮒ الوجن يندار
من حيث الوفي بهالوكت يندر
الموت اعله المسچ والورد يندر
ويعوف النذل والذاته رديه
==============
أحبك ماأحب بالكون سواك
سبحانه الذي من طين سواك
بشر لكنه ويه الگمر ساوال
وصرت إنته الگمر وايديك ضيه
==============
زرعت الصبر فوﮒ اجبال ورد
سگيته ومن دموع العين ورد
حبيبي انشد عليك الراح والرد
شعجب للحين متسير عليه
==============
اشكثر عني دليلي يامعانه
وتحمل گلبي يامه ويامعانه
يعمي انته معاهم يامعانه
تهد وتفازع وتاهت عليه
==============
خادم صرت في حبك يسلطان
وگلبي لو سمع صوتك يسلطن
حمل بغيبتك يسمر يصل طن
ويصل طنين من تگرب عليه
==============
يما خذني ويجايبني مع الماي
ردتك ياحلو تصبح معلماي
تعال وخلي آلآمك مع الماي
وانه وانته نضمدهن سويه
==============
سريت وتعبن اجدامي منعداي
مريض ولادوة ايشافي منعداي
ألف عين اكرمت لجلك منعداي
أباريهم وهم عدوان اليه
==============
ورثنه الكرم عن أبنه وجدنه
بأعز أرواح ضحينه وجدنه
درب للخير والغيرة وجدنه
وعليه سرنه بنهج رب البريه
==============
أنه اشبيدي على امر وامركم
سجين ولاجنح عندي وامركم
وهم يوم السجن يخلص وامركم
واعاتب كل شخص مامر عليه
==============
يگلبي بعدك بحبهم ولك حيل
الجرالك كله من عدهم ولك حل
دون من القهر وابچي ولك حيل
نصحتك ماسمعت ابيوم اليه
==============
تره اسهام الهوه كثرن ولاراد
أصيح وماإلي مجاوب ولاراد
نخيت الگلب ينساهم ولارد
لگيت الگلب وياهم عليه
==============
روحي اهواي ذبت من دماها
واسأل من كتلها من دماها
نديم الليل راحت من دماها
وصارت كالحجر حدر الوطية
==============
هدملي البعد شوگي وحبي
ويبست گاعي كلها ومات حبي
تمنيت الحلو يمي وحب بي
واگله البعد نار اتوج عليه