شعر شعبي عراقي ابيات شعرية

من طرف البرنسيسة الإثنين مايو 23, 2011 9:40 pm

شعر شعبي عراقي ابيات شعرية

اجيك بلهفة واتعنة وهملك
ولتضن يوم املنك وهملك
اذا ضنيت متاكد وهملك
لان ميصح مترهم صافي نية

ورد قداح اهديلك وجوري
وريدن ضيمي احجيلك وجوري
مرجو والعشك كمل وجوري
وشبة بركان حبك صار بية

انا الصياد وصادتني شبكتك
دخيل الله شكثر حلوه شبكتك
ادك عليك مشغولة شبكتك
كتلك بالجذب بس رمش علية

اخذ يمك گلبنه و بي تهنه
و اكل من زاد روحي و بي تهنه
حبيبي انت اهلنه و بيت اهلنه
و اعز من الاهل طلتك عليه

أبطن الحوت يونس ونته بيهة
المحاسن نسل منك ونته بيهة
لا تحرك مهجــتـي ونته بيهة
خوفي عليك مو خوفي عــلـية

عليه انشد ياصاحب بعد مابي
وجفن عيوني وشل دمع مابي
اذا تنساني شلي بعمري مابي
شسوي بعمري اذا رحت من اديه

حرت ليهسه احبك هل لساني
وكل ميهل دليلي هل لساني
هلس ولله غيابك هلساني
وصفه جلد وعضم ساتر عليه

احجي شما ردت تحجي علي كول
اصيل وما اهم انة عل يكول
جنت هداف شو جابو علي كول
وخسارة عشرتك شوطين هية

يروحي اتمعني ابوكتج وجربيه
وينشدني الوكت جم نوب واجربيه
ان جان الملح بيه حوبه واجربيه
اشعجب ملحي انكلب ضدي عليه

العشك موعيب بي رخصة وذن بي
وذنب الكلب موذنبج وذنبي
الكلب بي عين بي شفة وذن بي
شافج واستمعلج صاح هيه

ابيك آنة وابد ماكول.. مابيك
يل كلك محنة وشين .. مابيك
غبت عني واكول شبيك .. مابيك
من اغيبن هم يظل بالك عليه

احلى من العسل ياناس شفته
وبشارعنه العصر يتمشه شفته
هم يجي يوم اخلي شفتي على شفته
بعدها والله اتمنى المنيه..

وسفه الدهر شتتكم وطركم
حسافه ماكضه منهم وطركم
بذجركم هذا انه اهذي وطركم
يعيد الله شتتكم جمع ليه

زماني جرد اسيوفه وسنهه
عليه اوحرمت عيني وسنهه
وحق اللي فرض خمسه وسنهه
بعد هيهات عيش ايصير اليه

حبيبي دك بذرعانه ولجتاف
بضلعي جاسي اللبي ولجتاف
رضينه بحبس دندوشه ولجتاف
وهي سجاني وتفتر عليه

مر ولفي ايهبتني ومره هبته
ومره اوصلت يمه مره هبته
طحت مقدر يصاحب مره هبته
اسد يخسه الاسد ملقاه اليه

ابنار الهجر يامهجه دموعاي
على مصابي السمه يمطر دموعاي
اشما هلن يدندوشه دموعاي
حسناتج تبدل بالف سيه

سريتوا بالضعن ياترف هاوين
جفيتوني ولعند الغير هاوين
هاميت يحلو الطول هاوين
حياتي والنظر اقبالك عليه

وحم الالف واللامين والها
روحي بهوى ساهي العين ولها
لها ثغر وجبين وعين والها
خذ شبه البدر لو سطع ضيه

من مثلي دمع عيني يهلهه
سبب غالب على روحي يهلهه
وعلي تحيولكم ميت يهلهه
من تبدي ترد الروح اليه

حزني عليك مايبطل وناحي
اسب اللامني بودك ونا حاي
تبات الناس مستوره ونا حاي
ليلي والنجم يشهد عليه

وحك آية عصا موسى وسينا
الك حثت رجايبنه وسينا
الك حسن النبي يوسف وسينا
الي والنور الك والنار اليه

يحادي روعت قلبي بلحداي
يخايب لفني وياهم بلحداي
اون طول الدهر حتى بلحدي
على الساروا وخلوني شجيه

كل مغرم برت علته وناله
سعيد اللي حضه بشخصك وناله
الطارش من سمع نوحي وناله
ترك شغله وبجه رحمه عليه

الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه

روحي والهوى ودنياي وعداي
علي وشلون اشيل الجدم وعداي
صابر وانتظر واشوف وعداي
ابفرح لو دوم وكتي محيط بيه

ابكثر مانوح ملوني يراني
طحت والشامت ابعينه يراني
يخوتي السبع من جسمي يراني
اكبال اهلي وعمامي اتشوف هيه

اف من زماني اه منه
على اللي عشرتي وياه منه
اكله الدرب هذا يكول منه
اكله فوت بيه يرد عليه

دمه دمع البيابي سال وانهات
عليك اكضي العمر حسرات وانهات
بهواك انه اعذلتني الناس وانهات
ما خذني الهوه غصبن عليه

المصايب بس على روحي تلافت
يقلبي اعله النكر طيبك تلافت
اون وعطامي بهجرك تلافت
طريح وساد دوب النفس بيه

عفاني جيف الى مهجه ولي روح
اداري بالعلل كلها ولي روح
ماني بحال من يبكه ولي روح
ابحالك يالقطعت الوصل بيه

روحي مشت وياهم وهامت
على الما بينت منهم وهامت
اجفوف اعليك اطيرها وهامت
واخلي ادموم تجري اعلى الوطيه

تهت محد من احباب علي شار
ينجيني الذي شمسه علي شار
حجيت المصلحه طلعت على شار
رجيت الغانمه صارت رديه

هذا اللي لعند اعضاي هد هد
ملهي وابد ماينصاد هد هد
اكله اقرب يقلي ليك هد هد
ارفع مشتهاك اشتظن بيه

ناحل وامشي امكابر تراني
اجلد خاف عدواني تراني
تاره الموت يدهاني تراني
اصحه من يمر شامت عليه

قوم انصب يصاحب ماتم النه
على الوياه ليله ماتم إلنه
لون الرجل يملك ماتمنه
مهو بالهون فركاهم عليه

يصاحب لو تشوف اشلون كتماي
على عيوني ويسح الدمع كتماي
اشما اقل للروح سر الهوه كتماي
تحن وتهيج الساكن عليه

تظن انساك وانته الروح واسلاك
سبب مايوم مني انقطع وسلاك
أعيش آنه عقب فرقاك وسلاك
معافي والوشاة أعملوا بيه

هذا البيه كنتم لايميني
وعذر مافاد بيكم لايميني
لو تكتف يساري وي يميني
هذاك انه الهوى غالب عليه

اشمالك يازماني علي صليت
ابنار وحمسيت اجلاي صليت
مثل ماصلت ام عمران صليت
فنكحني الهوه وذبني بنويه

مدري لاتناشدني على احشاي
بجيت وصب دمع عيني على حشاي
تبعت الضعن وكفوفي على حشاي
إشما مال الضعن روحي إتميل بيه

أنام وشوك محبوبي يعاني
افز مرعوب واتخيل يعاني
هلي الدمع مرخوصه يعاني
على اللي بالوصل شحوا عليه

نصحته اولا نفع وياه نصحاي
سكاره احنه بهواه مابعد نصحاي
جفاني وصرت نصي ميت نصحاي
نحيل ولا اثر نكاد بيه

وحق التعبده شيعه وسنه
ذوله الحرموا نومي وسنه
عليك اسيوف جردنه وسنه
علمك يلعبدت اشميت هيه

اعذرني والوكت عنك لهاني
بعزاك الزاد الي ابدا لهاني
تفر من البدن روحي لهاني
بسبب ماشالت التابوت هيه