مكتبة الابوذيات 3

مكتبة الابوذيات 3
الشعر الشعبي العراقي - اشعار شعبية


السلام عليكم
اليوم حبيت انزل هل الموضوع وهوه عباره عن مكتبه للابوذيات 3


مكتبــــــة الأبوذيــــــات 3


عليك القيت حجة والقي يامه
يامه براسك احچي والقي يامه
تدري الحشر يمته والقيامة
القيامة الحشر من تزعل عليه
==============
عذاب الروح إنتي وانتي صحتي
ولامره نصحتچ وانتصحتي
بعدني مالزمتچ وانتي صحتي
وگلبتي الدنيه والوادم عليه
==============
يدهري اشحصلت منك بس الداي
عليه محورب وتهدم بسداي
آنه التدخل الوادم بسداي
صرت وحدي وادور سد اليه
==============
أنه المجروح من ناسي وخلي
واجيب الملح لجروحي واخلي
راح افتح قفل گلبي واخلي
كلمن مابچه يبچي عليه
==============
ترص ايدك واعاني من رص يدك
وانه الصياد واحلم مرة اصيدك
إذا سنتات ظلن من رصيدك
دخيلك بالچذب رمش عليه
==============
ماشاء وأظن اليوم شالك
وعلى راسه أحس الگلب شالك
على شعرك لون ذبيت شالك
تذب عالروح طرگاعة وبليه
==============
گلبي صار بسمك يعني مالك
وشنهو اللي بقالي عندي مالك
عشت بقصر حبك وانته مالك
ورضيت بجورك وظلمك عليه
==============
عرفتك واعرفت لغزك وحلاك
وحگ من جملك يسمر وحلاك
چذب من ايدي اهدنك واحلاك
لأنك روح وفراگك منيه
==============
التفت ليه بسهم عينه رماني
متت چن من جبل عالي رماني
حلو وفوﮒ القهر لابس رماني
شفته وطحنه انه وروحي سويه
==============
ترف نعجز ولانگدر نصف بيك
وربك بالحسن كلش نصف بيك
نص بيه صفه گلبي ونصف بيك
وضل يون عليك الباقي بيه
==============
يروحي بطلي المعاشر وعودي
سباني ونحل اعظامي وعودي
آنه الماخنت مرة وعودي
عجب ليش الحبيب ايخون بيه
==============
عجيبة تريد تنساني وانه اسلاك
أظنك لاگي من غيري ونس لك
أريد اعرف شنو أصلك ونسلك
وشنو إنته يبو اطباع الرديه
==============
شمالك ياضعن بهواي شتيت
أنه شمالي واهمن بيك شتيت
ان چان انته بقميص الصيف شتيت
أنه مصلخ شتاك المر عليه
==============
وحگ رمضان واشرافه وكتبه
عليك ايهل دمع عيني وكتبه
أنه شماريد أهم خطك واكتبه
شدهني جفاك من غصبن عليه
==============
يامن بالگلب والروح حليت
اجرعت مر الصبر وهواي حليت
الك چم مشكلة ياحلو حليت
وهواك المشكلة الصعبت عليه
==============
قرص نعناع خدك وانته هيله
الحسن بس لجنابك وانته هيله
تراب اللحد بيدك وانته هيله
ويظل اسمك حلو وغالي عليه
==============
حاير واطلب لدربي دلاله
وكتي بنار خلاني دلاله
يربي اشلون مرمرني دلاله
تهت وآنه الدليل اشلون بيه
==============
سواطير النوايب ثارمني
ويريد الوكت ياخذ ثاره مني
حبيبي الصوﭺ كله ثاري مني
بريء انته واذب الصوﭺ بيه
==============
أجيلك عمر يسمر ماتجيلي
وثياب الحزن ضاگت ماتجيلي
گضت كل الرفاگة ومات جيلي
وبقيت انته وتشح وصلك عليه
==============
أطب جنة عدن ياترف فرضاك
ولو تزعل ترض كل عضم فرضاك
إذا ربك يحلل علي فرضاك
أصليلك قدر واكثر شويه
==============
حبيبي شلون ما احبك ولابيك
وامك ماتحن مثلي ولابيك
عساهن بيه لوعاتك ولابيك
ويحول كل مرض منك اليه
==============
غيابك خلخل اعضامي وهدهن
واجر حسرات ببعادك وهدهن
إلي دمعات لو أبچي وهدهن
تفيض اليابسة ونغرﮒ سويه
==============
شجاك شغيرك عني ولاهاك
وحگ رب البشر كلها ولاهاك
بعد شبيك ما اگلك ولاهاك
ولا اريدك تجي وتسأل عليه
==============
گلبي انته ملكته وانته حربي
عليل وطبي عندك وانته حربي
كاس السم أشربه وانتحر بي
إذا غيرك يمس اطراف اديه
==============
ردت طيفك بيوم يلوح مالح
وطعم فرگاك صار هواي مالح
بعد ما ادز رسالة وبعد مالح
لأن كلما أدز مترد عليه
==============
دليلي بيدي اشلعنه واسلمه
لحبيبي اليحفظه ربي ويسلمه
ومثل ماحب عمر بالفلم سلمى
أحبه وبعد أكثر أنه شويه
==============
تمنيت الزمن يرجع وردكم
واظل يمكم أشم آنه بوردكم
إذا يحباب مرسالي وردكم
فرد مسكول دزو انتو اليه
==============
إلك گعدة بدليلي ودار من دار
وعلى غيرك حبيبي النظر مندار
أفرش روحي الك والگلب مندار
واذا مو گطن أصلي اعتب عليه
==============
مرتب ماشفت مثلك ولاصاك
ياهو الخربطك عني ولاصاك
بديه مذبحت أحد ولاصاك
ولجل عينك لصك روحي بديه
==============
تلمع شفة اوليفي بلابل
شفته وشفت كل ربعه بلابل
گالوا حلو گلتلهم بلا بل
رهيب وكارثة ونقمة وبليه
==============
حته اسمي نسيته بيوم شفتك
وگلت لگلبي فكني وگال شفتك
أخاف النحل يلتم فوﮒ شفتك
يشوف العسل حسباله خليه
==============
اضعفت ماواحد بربعي گواني
وشلت حملي على اچتافي گواني
أموتن جوع وابقه البس گواني
ولا فد يوم امدلهم إديه
==============
افلست وآلامي هاجت والصخونه
بوصخ لفلوس هلبت وصخونه
يهل رايح لخونه وصي اخونه
الخوة الصدﮒ خوة بلا وصيه
==============
الحزن من زغر سني لازماني
وعهد ويه المدامع لازماني
لاولفي رحمني لازماني
مصبر عالجرح والبيه بيه
==============
حرت ياهو النچزه والنظيفه
بسبب خبطت الوصخة والنظيفة
صفه حتى النزوره والنظيفه
يذب شكواه قبل الجودلية
==============
هاك اخيوط روحي هاك ابرها
ولو صاير بحرها وهاكبرها
إلك حسرة بدليلي هاكبرها
علي ثگلت مثل ثگلك عليه
==============
الگلب من ساعة الحبك هلك ليش
أحچي اوياك ماتحچي هلك ليش
اقتنعوا كل هلي بحبك هلك ليش
ماقنعوا بحبك ليش اليه
==============
بليل وصبح طيفك لازماني
طحت لنته ارحمتني لازماني
شوكت تدريني اشوفك لازماني
أصير اجنازة بلچي اتمر عليه
==============
حبيبي اخلاف عينك مالمعنه
واسألك هذا گلبك ماله معنا
الحچي كله بغيابك ماله معنى
لأنك بالكلام اتذوب بيه
==============
أعد اجروح گلبي مايه عدي
ولهسه الفرح صدّﮒ مايه عدي
أگل للحزن عدي مايعدي
يدوس اعله الجرح ويعم عليه
==============
ماشايف مثل شكلك ولاماس
إنته اللا ذهب مثلك ولاماس
أنه المابيه نص طگه ولامس
صرت مجنون من نظرك إليه
==============
هوينه ومن هوينه منهوينه
غشمة وماعرفنه من هوينه
اليوفي بالمحنة من هو وينه
إذا تلگا أگص اثنين اديه
==============
أنه الماعوف شخصك أبد متراك
وتعمه العين لو فد يوم متراك
شريته بروحي لو ينباع متراك
وفصلك ثوب لايگ بس اليه
==============
سفن حبي بشواطي الروح شرعن
ولجل حبك أمشي الگلب شرعن
ردت مذهب يخلي البوس شرعن
واذا ماكو أرد للجاهليه
==============
وحگ رب التعبده الناس واحد
حبيب الگلب موش اثنين واحد
إذا للصحبة ردت اختار واحد
أختارك إلك وانسه البقيه
==============
أريد اگصد لعد گلبك وظيفه
وحط حبي على حبك وظيفه
إذا صار العشگ يمك وضيفة
فلا أطلع تقاعد للمنيه
==============
صرت مو بس حبيبي قطعة مني
وگلبي بسيف رمشك قطعه مني
لأن لحظات هجرك قط عمني
يرد الشوف لو رديت اليه
==============
يگلبي شبيك عالمحبوب حنيت
نسيت اجروحه منها الظهر حنيت
دشوف آنه بفراگه الإيد حنيت
واهلهل گمت من يبعد عليه
==============
يگاطع بالهجر الارحام وصّل
ومد اجسور للصوبين وصل
لعگرب لا تأمن يوم والصل
يلدغك لو چنت له بيوم اخيه
==============
ترف يامن ضعنكم مر علينه
هجرتونه وجفاكم مر علينه
احلفت مهما الزمان ايمر علينه
منسه ايام عشناها سويه
==============
عگدت الگلب وسط الشوﮒ باسلاك
ونذرت العمر ويه الروح بس لك
أحبك لاتفكر يوم بسلاك
أنه بنومي ويمر طيفك عليه
==============
سواد العين بعدك سال مني
وعذولي من المكابر سالمني
هواي چفوف بعدك سالمني
ولهسه ونار چفك بين اديه
==============
بدو من حچو بالزينة بدوني
وماني بصحبة الصاحب بدوني
دروح وشوف دنياتك بدوني
يمسك ضيمها وترجع اليه
==============
هفت نور الليالي وعلي ظلمن
وبعد ما دللني سنين ظلمن
هذا الطاح حدري منين ظل من
طلع ظلي وسحگت آني عليه
==============
ألف الدنيا كلها وماتلفني
عنيد وغير شخصك ماتلفني
عمت عين المنية الماتلفني
لأن فرگاك حيل اثر عليه
==============
أريد اكتب رسالة بحبر من دم
على العمر الكضيته اوياك مندم
شما ضحيت للطيبين مندم
أندم على الأخو اليگطع أخيه
==============
عملاق وجبل والباقي دﮒ دﮒ
مايرحم خصم بالگول دﮒ دﮒ
وشم عالإيد آنه اكتبت دﮒ دﮒ
مشجع برشلوني للمنيه
==============
نذرت الروح لعيونك وعدلاك
ومامش بالخلگ مثلك وعدلاك
إنته او لا عوج منك وعدلاك
شعدل بيك يالروحك أبيه
==============
من زغري افگدت ملگاﭺ يمي
واحن واشتاﮒ واتخايلچ يمي
نساني الفرح بس الحزن يمي
وگطع بيه أعز الناس اليه
==============
العطش مرسوم بعيوني وشفتي
وشگول اعله العشگ وهله وشفتي
أضن للدار زرتيني وشفتي
لكل اهل العشگ داري زهيه
==============
حبيب الروح طبعه حار شطة
وانه غرگان كلي بماي شطه
أگلها انطيني مي تنطيني شطة
شربته و ماردت تزعل عليه
==============
صرت عطشان حبك وانته كاسه
العشگ بعدك خسارة وانتكاسة
بطولة عشگ سوو وانته كاسه
وربحتك وحدي وارفعتك بديه
==============
حياتي بدون شخصك شلي بيها
وجميع اعظاي صارت شلة بيه
توديلي رسايل شلي بيها
ردت شوفتك والگعدة سوية
==============
مو مرة ولا مرتين مرات
أحاچيك وترد زعلان مرات
ضوگني هواك سنين مرات
وهذاك انته العزيز اتظل عليه
==============
ترف حسنك فريد وماتتمه
يشح وصلك عليه وماتتمه
صرت مثل الرضيع الماتت امه
يتيم ومنو مثله بهالبليه
==============
يريت البيك بيه ايصير لاباك
ولا اشوفك أبد مهموم لاباك
لا أمك عليه تحن لا باك
عاين هالغرام شسوه بيه
==============
ترف شامة اعله خده بيره بيها
وجنته الدمع حافر بيره بيها
ضگت طعم الشفايف بيرة بيها
بستهن والسكر بين عليه
==============
احباب الروح گلبوا فرد گلبه
اوكتنه بلون نص الليل گلبه
دفعني وانگلبت شلون گلبه
سحگني ومن عثر ظل يسب بيه
==============
غزل عينك رهن روحي وجرها
وشعل نيران البگلبي وجرها
أريد اتمسك بشفتك واجرها
حته انقل ذنوب البيك اليه
==============
مثل جنح الفراشة اشفاك وارقه
وربيع العمر منك راد ورقة
إذا بوسة حبيبي انطيك ورقة
واذا حضن بحضن دفتر هدية
==============
بعد ماأصطبيلك وانتبهلك
واحذر حيل مني وانتبه لك
أنه بأهلي أزامط وانته باهلك
واذا أهلك زلم هدهم عليه
==============
يربي لو نخاك العبد عينه
سودة وماتحب الكحل عينه
رفع طرف العباية وشفت عينه
وشفت ميزان ونجوم وثريه
==============
غرف رمان بخدوده غرف تين
ويريت اغرفلي من حسنه غرفتين
دأجر مشتمل گلبي غرفتين
والإيجار بوسة بكل مسيه
==============
شفت شمس وگمر يضوي خلالك
ربك من وجه يوسف خلالك
تنحه الحسن عن عرشه خلالك
لأن شافك صبح وكت المسيه
==============
يجي يوم وتشوف انجوم ضهرك
عجب گلبك چذب مو مثل ظهرك
أنه بشدتك چنت حزام ظهرك
شعجب گدامك يطعنون بيه
==============
عيوني من الدمع جفن وغارن
واحب الخيل لو ركضن وغارن
واموتن لو تحب غيري واغارن
واغار من الهوه اليدخل الريه
==============
يلايم لاتلوم النفس خلها
وعساها تموت عگب فراﮒ خلها
لزم إيدي الطبيب وگلت خلها
الألم داخل مهجتي شلون بيه
==============
حزن دنياي تمطر ماصحتلي
وردت فرصة أشوفك ماصحتلي
وگفت اگبال عينك ماصحتلي
وصحتلك مادرت وجهك عليه
==============
تظل صاحب فضل وشكبر فضلاك
وخلگي مافضه لغيرك وفضلاك
أميزك عالخلگ كلها وافضلك
وبسمك أحترس صبح ومسيه
==============
خلافك بعد أسمر من ونادم
ومتحسر على شوفك ونادم
عيون الناس مي تجري وانا دم
بچت عيناي من فرگاك اليه
==============
حرام الدمع ينظم شفت اكته
إلك يالتيهتني شفتك أته
جمر حرگتلي شفتي شفتك اته
جهنم بيك وآنه ابليس بيه
==============
صحبتك ليش گصرت ما طلتها
وانه الدنية اعله مودك ما طلتها
چنتلك فرصة سهلة ما طلتها
اخسرتني بسبب بطرانك عليه
==============
صفه گلبي و گلبك ليش ماراق
وعجب گلبك صدﮒ لليوم مارق
گلبي من تزرفه بسيف مارق
شجاه يصيح زرف بعد بيه
==============
صديق الفاضلك بالطيب فضله
ومثل ما فضلك عالناس فضله
اشكره ومو جزاته انكار فضله
يجيلك يوم هم تحتاج فيه
==============
يامن فارگت شملي وشملاك
اسمعني والحچي يخصك وشملاك
إذا غيري وصل خدك وشملاك
حرام يبوس خد الچان اليه
==============
گلبي ما لعب غيره لعابه
واحسن شفه لأمراضي لعابه
سبحان الذي صاغه لعابة
ونفخ بيه روح حته يعم عليه
==============
عيون الگلب يوم اجفاك يدمن
عفتني وصافحت ياترف يدمن
أنه المثلي على الحسرات يدمن
عسه أنسه هواك اشعمل بيه
==============
سچاچين الوكت بالروح بردن
واحس الجسم وكت الصيف بردان
انه بردنين رحت وأرد بردان
واخاف الغربة تاخذ حتى اديه
==============
سهول الناس عندي وانته راسي
سفن غرگن ابحري وانته راسي
صديقي انته واخويه وتاج راسي
واعز منك تره ماكو عليه
==============
أفرح لو شفت وجهك وسر بيه
وحبك ثابت بگلبي وسر بيه
شما طال الدرب أمشي واسر بيه
واجيب الروح لعيونك هدية
==============
گلبي شم عطر خدﭺ وراساﭺ
وعلى مرسى العشگ حطچ ورساﭺ
أحلف بالغزل واهله وراسچ
معوفنچ لون تدنه المنيه
==============
أساس بعشرتي وياك صبيت
وجنني الهوى وبالشوﮒ صبيت
إذا إنته عليه ادموع صبيت
بچيت اعيون من فرگاك اليه
==============
أذوبن شمعة واتأمل تمر مر
عزيز الگلب بفراگك تمرمر
أنشدك هم ضگت مرة تمر مر
وانه البرحي انگلب حنضل عليه
==============
تلفاتچ يدنيه من تلفني
وابيض ثوب روحي من تلفني
فرني اشتلگه بيه من تلفني
غير الحزن ماظل شي بديه
==============
حبيبي اشأخرك عني وماييت
الوسيعة ضاگت بعيني وما يت
طريح وناحل بهجرك وميت
ارحمني بصدت عيونك عليه
==============
روحي اتگول عدله ماني ميته
وعجب زرع الزرعته ما نميته
وهذا الليل كله ما نميته
فراﮒ وحرموا وصلك عليه
==============
زبد يا ملمس الوجنة من الحر
أخاف اتموع من تمشي من الحر
ابن آدم صورك ربك من الحور
وانه الدافع ثمن هاي الاذيه
==============
شلون الروح اكضها من تهم بيك
ومثل تهمة حبيبي متهم بيك
الضيم اليمر بيه منته هم بيك
ولا چنك وانه مبين عليه
==============
صفنت الها وضربت اخماس بسداس
وتعبت اعله البنيته اوياك بسداس
صحيح انته لعبت اوياي بسداس
اغلبتني ابطيبتي العمت عليه
==============
أمر بالدار واسمع حنة بيها
اظلوعي والمفاصل حنه بيها
چفوفي لاتضنها حنه بيها
مسحت الدمع دم واثر بدية
==============
اشمعد ايام عمري وانسه عدها
واگولن وين عزها ونسعدها
عجيبة الناس تضحك وانسه عدها
بطر لو من سفاها اضحكت هيه
==============
سيوف الدهر بس ليه جردهن
وليالي الشوم لبسني جردهن
علي حسبات لو رايد جردهن
دفاتر كون ما تلحگ عليه
==============
اعيوني لشوفتك ركضن وجداً
واريدك مو لعب فعلاً وجدا
وآنه اهواك عن أبا وجدا
واحبك من عصور الجاهلية
==============
السائل سأل شنهو الصار وجره
وليش أمست مهجنه ابنار وجره
گلت كاظم الغيظ انفقد وجره
مدامعنه وفجعنه بهالرزية
==============
عجب مامر عزيز الروح بس لاح
رماني وردت ارد السهم بس لاح
لجيبك لو تصير اليوم بسلاح
وتداوي جروح علاتي الخفيّه
==============
أحبك أكثر من الكون وانسه
وعندي الموت اذا يرضيك ونسة
مافارﮒ أبد ذكراك وانسه
واقدم روحي لعيونك هدية
==============
يبو طول الجميل ووجه فاتن
إلك سهمين بالدلال فاتن
تبارك من خلق من طين فاتن
خلق فرح وعذاب وهم اليه
==============
الك گلبي ونظر عيني هدايه
وعليك اسلم يالعيونك هِدايه
الجمال يصيح ياعالم هدى آيه
ويوسف من تمر ياخذ تحيه
==============
ربچ صفطچ تصفيط آيات
ومو آيه الجمال البيچ آيات
هو اشگال گلبي بشوف آيات
خر گلبي ووگع بثنين اديه
==============
يسيل العسل صدﮒ مرطبنه
إذا فد يوم شخصك مرة طبنه
مرة تصير علة ومرة طبنه
ومرة اتصير إنته الصيدلية
==============
قسيت اوياك يسمر عمي آنه
وعين الما تشوفك عميانه
إذا خالك فزعلك عمي آنه
تبره وضحك الوادم عليه
==============
أنه گلبي نسه اضلوعي شرد لك
وظل مديون كل عمري شرد لك
إذا كل يوم تذكرني شرد لك
أمد روحي جسر واعبر عليه
==============
يعاذل نار شوكَي هل تمسني
اهديني لشوف حبي والتمسني
بچه من مد يمينه والتمسني
لگاني نفس مامش جسد بيه
==============
أريد اغفه على اذراعك وانامن
گضينه الحب تمن انته وانامن
وحگ عينك نسيت اسمي وانامن
تهت أرجوك دليني عليه
==============
همي من كثر يذبل وراها
ونار الگلب مايخمد وراها
كل شدة يهل وادم وراها
فرج والفرج من رب البرية
==============
روه الزيتون من دمعي والراك
وغيرك مانحل جسمي ولاراك
أخاف اتطول غيبتكم ولا اراك
الوصل شيفيد من تدني المنية
==============
كل مغرم برت علته وناله
وسعيد اللي حضه بشخصك وناله
الطارش من سمع نوحي وناله
ترك شغله وبچه رحمة عليه
==============
سريتوا بالضعن ياترف هاوين
جفيتوني ولعند الغير هاوين
ها ميت يحلو الطول هاوين
حياتي وأنظر اقبالك عليه
==============
مدري العيب عدك مدري عدي
مدري غلط عدك مدري عدي
مدري اوگف واطالب مدري اعدي
واگولن ينصلح ويرد اليه
==============
الدمع نهران بخدودي كراها
حبيبي سلب من عيني كراها
ليش امحبتك صارت كراها
اشبده مني وتشمت اعداي بيه
==============
بسواد العين يسمر منته رابي
شعجب گلبك تغير من ترى بيه
أنه ماظن ترابك من ترابي
حضنتك والعسل چلب بديه
==============
حبيبي اديارنه لو جيتوا مرها
ونفسك عالوفه والطيب مرها
عشرتك ضگت حلوتها ومرها
وطلع مرها أمر امن المنيه
==============
وگعت وصحت آنه إلك أخ أخ
تأذيت وبچيت هواي أخ أخ
حسافة تعوفني ياخوي أخ أخ
إذا باول مصية انكتت بيه
==============
امن اعد زينين صدﮒ آنه اعدك
شما تحتاج گلي آنه عدك
خم روحك وتلگه آنه عدك
مالكني ولا فرطت بيه
==============
بحر شريان گلبي وانته مايه
صفر بالحب أخذنه وانته ميه
انتسابي إلك وحدك وانتمايه
ومتى بحبك توقعلي الهويه
==============
ذهب صافي طبعنه ماصدينه
وابد للي نودهم ماصدينه
تصيد الناس واحنه ماصدينه
رغم نفس المچان انذب سويه
==============
التعب والضيم جنبي الراحة جنبك
اشتضن من نار گلبي راح اجنبك
عشگ العقل خلص راح اجن بيك
واموت بعشرتك وابليك بيه
==============
زوج طيور حبنه صفن بس تك
وصرنه للشماته علچ بستك
ماأدري شجاني وگمت بستك
اعذرني عالجرالك مو بديه
==============
يهل ناديت بسم هواى عيده
اويه هل ماخذ دليلي اوياك عيده
الگلب مو بس بعد رمضان عيده
عندي العيد من نگعد سويه
==============
مرارتنه يصاحب مرها منكم
وانه المعلول وابحث مرهم الكم
تدري ليش آنه مرهم الكم
آنه ارهم لابو اطباع الوفية
==============
هاك اشعل گلب گلبي وجهاك
اعله حالة راح اعلمنك وجهاك
بشالك من تلف شعرك وجهاك
تلف روحي مثل لف المنيه
==============
كلمن گال سوف اعمل وسبني
چنه بحچيه شتمني وسبني
أگله من الوطن إطلع وسبني
آنه ابني الوطن بثنين اديه
==============
طبع اليحفر بصحراء يعراﮒ
ومن طبع الشجر بالطين يعراﮒ
ومن طبع العراقي ايصيح يعراﮒ
إلك يغدي العمر فدوة وهدية
==============
أشد حبل الوصل والگاه محتال
بسبب لن التريده الروح محتال
سكن گلبي ورضيت ايكون محتال
وجبتله الكرسي ريسته عليه
==============
يظل غامض سؤالي اوياك منحال
وجسمي من السهر وياك منحال
وحياتك صرت يبن الناس منحال
العسل حصتك وانه اللسعات بيه
==============
يحلوة الطول من تمشين بالراح
بمشيتچ مو طحنتي الگلب بالراح
تعذبت وصفگت الراح بالراح
وراحت روحي من مريتي بيه
==============
علي دنياي صبت غيض چزيت
وروحي من القهر والضيم جزيت
عشرتك والإسم فد نوب چزيت
السبب مديت إيدي وعطت بيه
==============
تعال اگعد نصفي الإلك ولي
عليه انوب ياهي تريد ولي
گتله خل ابوسك گال ولي
شنهي تبوسني وتنگ عليه
==============
شفكن من هواكم بعد شفتك
وعلي طفر عسل من حچت شفتك
طحت كلي اعله كلي بيوم شفتك
دگضني مو طحت كلي عليه
==============
عليل ومن بست شفتك شفتني
ولتگلي العشگ فتك شفتني
اذا كلك طحت لمن شفتني
أنه اتوذر إذا تخطف عليه
==============
مريض آنه وصعد مرضي على اشفاي
وطب لندن فلا يلحگ على اشفاي
حبيبي من تحط شفتك على اشفاي
أطيب وكل مرض مايضل بيه
==============
صرت كلي جرح بجفاك ودي
وشوفك كل مسه ومصباح ودي
إذا خلص رصيدك علي ودي
أمد شريان وانته اتصل بيه
==============
جمال وچان عندك كله فتنه
واجب رغم حچيك كله فتنه
تدري اشگد فرگتك كلفتنه
مثل الراح دفان بأخيه
==============
هله ياللي عشرتي اوياك_مأسات
إلك خدين بيض أتگول ماسات
أسكر لو شفاي شفاك ماسات
واذوب ومايظل كل حيل بيه
==============
وحگ الألف والآمين والها
ابعدها ماتسله الگلب ولها
الشمس صارت مناصف إلي والها
بخدها النور وآنه النار بيه
==============
يون بسمك دليلي انته وانته
تاه وأرد اسألك انته وانته
يحب اثنين غيرك انته وانته
تركني وإنته بس ضليت بيه
==============
زرعت الدرب لجلك وردة وردة
وعذب منهل ودادك وارد اوردة
مثل يعقوب حالي ورده ورده
لاردلي القميص ولاله جيه
==============
ببعادك صفيت اشبه خرابة
واحس بيتي علي وحشة خرابة
يوم اليگظي من دونك خرة بيه
الموت اهون ولابعدك عليه
==============
من زغري الحزن والضيم چلباي
ويروحي بحبل صبرﭺ حيل چلباي
أكل عظمي او وفه وياي چلباي
وبعضهم أكل لحمي وخان بيه
==============
وحگ من ذا الذي أسرى ولعراج
على الشينات ماردن ولا اعراج
العتب مو على الما يمشي والعراج
العتب على الصاحي ميسويله جيه
==============
طحت مابيه حيل اعدل ولا اعوج
ودليلي ابنار لهابة ولع وج
اتشمت بيه الصاحي والاعوج
وغمان الوكت سولفوا بيه
==============
حبيبي بيا بخت وياي شديت
وگلي بهجرك شقدمت شديت
إصبعك حتى تذكر خيط شديت
انحصر دمك ولافكرت بيه
==============
بعد شتأمن من الخان شرجاي
وعلي غير شمالك صار شرجاي
أعرفك من تجيني اوياك شر جاي
وتطش يمي المصايب واهليه
==============
انياب الدهر عضن من شراها
وبالله ارجوك كفني من شراها
صحت للبيع روحي من شراها
شراها الچان يحلملي بأذيه
==============
تبلل ثوب حزني ما شريته
مشه وريته اعله گلبي ماشي ريته
حل بية الشراني ماشريته
شريت الباعني ومارحم بيه
==============
احلفت ماأبچي بفراگك ولانوح
وبعد ما ردد بإسمك ولانوح
يوسف مبتله مثلي ولانوح
ولايعقوب مر مثلي بأذيه
==============
أعلن ياگلب حبك وشيعه
واتبع راي كل مخلص وشيعه
عيب حچاية السنة وشيعة
الوطن لاهل الوطن كلهم سويه
==============
آخ اشگد احبنكم واجلكم
وگلبي انشلع من صدري واجلكم
أنه اتمنه يحين اجلي وأجلكم
بگبر واحد يدفنونه سويه
==============
جفيت وخلفت بجفاك عبرات
ونيني وصل سابع جار عبرات
أنه الشاطر عليه اشلون عبرات
مشه وماچلبت بثنين اديه
==============
شجاك شبيك لامريت لايت
وهاي الروح عگبك حيل لايت
يبو عيون الوسيعة تگول لايت
ضرير آنه دحط عينك عليه
==============
ونيني لاسنة بطل ولاعام
وسجني خاص الي وحدي ولاعام
أخبرك لا أخو ينفع ولاعم
بس الله العزيز يحن عليه
==============
صفت شمس الضحه بالعين ظلماي
حزين ولا بقه بالعين ظلماي
أنه المظلوم محد عرف ظلماي
جفوني العشت وياهم سويه
==============
حرت مابين أتاني ماأتاني
وعدد شماتي يمكن ماأتاني
انتظرته هواي تالي ماأتاني
ماريده بعد لو حب اديه
==============
أون ومن ونيني اعضاي خوان
شجاني وماعرفت الوكت خوان
حسافة الچنت اعدهم إلي خوان
صفوا عدوان بعد الصار بيه
==============
الدهر بس البراسه اجنون يمنه
غدر بيه وبجاري الچان يمنه
ماتنتصر يسرة بغير يمنة
ولا يمنه وحدها اتحل قضية
==============
الدهر أغضب عليه ودار وجها
وبنيرانه چوه احشاي وجها
صديقك لو زلف عالعدل وجها
مو بالعكس تحفرله ابهبيه
==============
جره دمعي على الوجنات ياحيف
على اللي مايقدر التعب ياحيف
آنه الچنت اخوف خفت ياحيف
ولذت بالچانوا يلوذون بيه
==============
حنيني اعليك أمك ماتحنه
وظهري لغير شخصك ماتحنه
أسف چفي بمحبتك ماتحنه
تحنه دموم من گلبي الخطيه
==============
لاتأشر على الماشي ولتصح
وخوة صدﮒ ماظلت ولتصح
اعضامي أبد ماتبره ولتصح
أصحه لو يمر ذكرك عليه
==============
عيني من الزغر دمعي نغمها
وروحي ما بعد يطرب نغمها
الدنيا اخلاف عشرتكم نغمها
مثل موته انتمشه اعله الوطيه
==============
علي مرت يناهي ايام سودة
واريد اصبغ اهدومي اعليك سودة
حبك بالگلب والروح سوده
أونن والطبيب احتار بيه
==============
كل من شاف حالي أبد مالام
وعرفني وشاف جرحي كلف مالام
صرت مثل الطفل بالمهد مالام
يتيم وعيشته كلش رديه
==============
يهل ناوي على الهجران وك تان
خامك لاتخبطه بصوف وكتان
بالدنية يمر عالبشر وكتان
وكت راحة اوكت كله أذيه
==============
يلايم لا تلوم الگلب بسعاد
صدﮒ ناس بضليمة وناس بسعاد
يهل گاعد توالي الليل بسعاد
تذكرني بوليفي الخان بيه
==============
هلال افراگم روحي وهلها
ودمعتي مرة أكفكفها وهلها
البصرة وكل نواحيها واهلها
الوجودك فرحت وأدت تحيه
==============
عذاب الشوﮒ شبگ ساعديني
وساعة انخه الأيمة ساعة ديني
على نص المصايب ساعديني
كلف ظيم العشگ كله عليه
==============
وحگ صفين والخندق وحطين
أملش الراس بغيابك وحط طين
واطير من الفرح صدﮒ وحطين
إذا بالطيف مرة اتمر عليه
==============
أخوي اللي ردت وياه نبله
رماني وشج الي بحشاي نبلة
إذا إحنه امن اهلنه النوب نبله
اشتظن نرجه الغريب اعله الحمية
==============
العگل تكين تك انجن وشل تك
بسبب داريتك بزغرك وشلتك
عصرتك عصر بچفوفي وشلتك
لگيتك بس عذاب ونوح اليه
==============
بچيت وبالدمع للعين صفيت
اخبطوا ياما اخبطو واشكثر صفيت
يصاحب ويه دهري اشبيك صفيت
انطبگتوا اثنينكم عدوان اليه
==============
آنه الماعرفت اولك من اتلاك
وياهو البالحسن گبلك من اتلاك
يعشعش وهم بعيوني من اتلاك
كتاب وصعب تفسيره عليه
==============
بصحن شوگك يروحي دوم نطفه
ولا من نار حبك يوم نطفه
أحبك ياترف من چنت نطفة
وكاروكك بتوتي وذني ادية
==============
أشوف العمر لايسوه بلاهم
ولو منهم علي زايد بلاهم
وينه المسعد وعايش بلا هم
واسأله اعله الفرح ميمر عليه
==============
الحزن ماينحسب لو ردت عده
على المبعد واخذها الروح عده
يعمري اللي على العشرين عده
ظلمة وهالليالي تمر خفيه
==============