مكتبه للابوذيات 2

من طرف **admin** الإثنين مارس 21, 2011 3:30 am

مكتبة الابوذيات
الشعر الشعبي العراقي - اشعار شعبية

السلام عليكم
اليوم حبيت انزل هل الموضوع وهوه عباره عن مكتبه للابوذيات 2

مكتبــــــة الأبوذيــــــات 2

إحنه اجيال ربينه وعلمنه
ويظل مرفوع ويرفرف علمنه
ويظل يزهي ويظل خالد علمنه
وتظل بغداد أم العلم هيه
==============
يمحلاته الحلو يمي ونيمه
على صدري ولوليله ونيمه
گمر مو بشر بالخلقه ونيمه
وابد ماشفت مثله اعله الوطية
==============
أيا دمعي انگضه وماشفت راحات
أعظ بشفاي حيل افركت راحات
الليالي الماردتها اتروح راحت
واجتني الماردتها اتمر عليه
==============
المايوفي بصحبته مرضه عنه
والبشر يطلع على اللي مرضعنه
حبيبي اگبال عينه مر ضعنه
نكر عشرتي وسد بابه عليه
==============
لأن طگات شماتي بهاماي
وشل لاتظن عيني بهاماي
إذا عالذل رضه يبصم بهاماي
أگطعه انچان يرضالي برديه
==============
زماني حد علي سيفه اولاني
واخذ مني أعز ناسي ولاني
صرت لا آني متفارﮒ ولاني
عشت وي ولفي براحة وهنيه
==============
الدهر لابويه خلالي ولمي
جريدة اصبحت لليقره ولمي
يدنيه حشدي اجيوشچ ولمي
على هذا المصاب الصار بيه
==============
سگيتك من دموع العين قدحان
ولا گلبك علي فد يوم قدحان
تعال اگرب حسابي اوياك قدحان
أخذ الإلك وانطيني الإليه
==============
يطير اخذ الكتاب اوياك وصله
للأعرف عمامه منين وصله
الگلب بجفاه صار اثنعش وصله
كل وصله تطالب جيبه ليه
==============
شفت حلوات خزرني وفاتن
وحسنهن يجلب الناظر وفاتن
حضي الماحوه بمروة وفاتن
أخذني ايگود بيه لجاسمية
==============
إلك هيبه والك جاه وسعراي
والك نار اوجرت بيه وسعراي
أريدك تسمع اشعاري بوسع راي
واريدك تنطي رايك هسه بيه
==============
حبيب الروح كونك هسه ياماي
مثل يامه وافراگك كسر ياماي
وعطش فرگاك يمته اشربك ياماي
يمي زمزم وأعذب منه ميه
==============
يمته من الحزن نفرغ ونخله
ينخلني الزمان بيده ونخله
خط آنه وفسفورة ونخله
عراقي ومامزور بالهويه
==============
عفاني اشلون الي مهجة ولي روح
أداوي بالعلل كثرن واليروح
لاني بحال اليبقه واليروح
بحالك يالگطعت الوصل بيه
==============
مشيت وشوگكم عدني وردني
ومسحت الدمع بچفوفي وردني
إذا مكتوب من عدكم وردني
مثل ميت ترد الروح اليه
==============
شفتچ وانگطع بالگلب بتي
ويريت بحظني ذاك الليل بتي
إذا بالعمر إنتي بعمر بتي
وانه امن ازغر بناتي ازغر شويه
==============
يامه ادروب لجلك ماشي بيها
يالبالكون كله ماشبيها
لگذلتك كون اصيرن ماشه بيها
وكل ساعة تمشي ايدك عليه
==============
همت وانسلب عگلي وزاد مرضاي
على المامر عليه شخص مر ضي
لون تسكن بلب احشاي مرضاي
أگول اگرب يهل مبعد عليه
==============
أبد ميهمني لاحسنك وشكلك
وليهمني شنو شربك وشكلك
أريد بگلبي اشدنك واشكلك
واعيش اوياك عمري للمنيه
==============
أنه المظلوم من ساعة ولاداي
حته احبابي تركوني ولاداي
مريض بدون لاعله ولاداي
سبب مرضي زماني اغبر عليه
==============
أبيك آنه وابد ماگول مابيك
يالكلك حنان وشين مابيك
غبت عني واگول اشبيك مابيك
امن اغيبن هم يظل بالك عليه
==============
يفز گلبي بتوالي الليل ويروح
يمك يالمليته اهموم ويروح
عشرتي اوياك عشرة جسد ويروح
إذا تتركني أموت شلون بيه
==============
أشرفنك على العالم وافضلك
ودمعي ماجره لغيرك وفضلك
أنه امن أذكر بعض طيبك وفضلك
أشكرك كل صباح وكل مسيه
==============
خلص عمري أدور اعليك وانشد
وبحروفك أغني صرت وانشد
بعدك بس نداوي اجروح وانشد
نخيط جرح بس ينفتح ميه
==============
اغيم وامطر وانخبط واصفه
على اللي راح مني وتاه وصفه
حبيبي وچان للبلواي وصفة
أشگ الچفن لو مر طيفه بيه
==============
بس احنه المصيايب صاحبنه
لأن كل ساعة نفگد صاحب النه
إبنه المات محد صاح ابنه
أخاف انصيح ويعدمون اخيه
==============
إدي لليوم تنزف من رصيدك
لأن مرة انته صايد مرة اصيدك
عليه اصرف دقيقة من رصيدك
وانه اعوضك إذا تصرف عليه
==============
حفرت الجدم چيفن يوم طبله
ولا مرة الهوه والوكت طبله
الوكت خلاني بيد اعداي طبله
أصرخ والچفوف ادﮒ عليه
==============
صلاتي وقبلتي إنته واذاني
وبعدك قلق سببلي واذاني
اليزعلك أگلب الدنيه واذاني
واليحبك أخلي بين اديه
==============
دمع العين لجريلك وهملاك
وانه الما همن بروحي وهملاك
الملائك حنت لحالي وهي املاك
چا گلبك صخر ماحن عليه
==============
شفتك وآنه دايخ يوم شفتك
ومافكني هواك شلون شفتك
أخدر لو تبلل هاي شفتك
واذوبن وانعمي من اتكض اديه
==============
إلك صار الگلب سلوه ويظل لك
ويويله اليبعدك عني ويظلك
أغار اعليك من تمشي ويه ظلك
واغار اعليك من روحي عليه
==============
الدنيه شما احبنها وابرها
تزرفني بمخايطها وابرها
جاعت ناگتي وأكلت وبرها
الدرب طول واخاف ترد عليه
==============
سلالتكم نسب يوسف نسبها
الدنيه بغير نظراتك نسبها
الوادم مية بالمية نسبها
بس نسبة جمالك سبعميه
==============
طعم آلو شبگتك منگه رصتك
مكسبه اشفاك وطني من گرصتك
بتليت آنه اعله عمري من گرصتك
سعف ترجف لهسه اطراف اديه
==============
علي دوم الليالي تلف وتدور
ولجلك رخصيت الذهب والدر
أحبك من زمان الدار والدور
شعجب لمن كبرنة تخون بيه
==============
صرت نار بدليلي ومنك ابره
شتظن أنسه آني ومنك ابره
تعال الخيط مني ومنك ابره
نخيط اگلوبنه ونلتم سويه
==============
سهامك بالگلب صابن ولاحن
وكلبك مابچه لحالي ولاحن
بهلال العيد ماأفرح ولاحن
أفرح بيك من تسأل عليه
==============
أنه الشديت جرحك ليش حليت
عليه وحلة الطلاب حليت
ذكرتك بمتحاني وغلط حليت
شجاوب وانته شاغل حتى اديه
==============
بين ضلوعي شلتك ماهملتك
وبقيت بجفن عيني ماهملتك
حسبالي الخيانة ماهي ملتك
لچن هسه اتضح كلكم سويه
==============
ربي لاتموتني مع المات
حتى الدنيه لتگلي معلمات
أنصحك زوج اولادك معلمات
يشيلون الحمل يوم البليه
==============
وزارات العدل فشلت والاوقاف
وبعدك لاأسير آنه والاوقاف
(مر) طعم الشهد عندي ولو (قاف)
تحطلها وتشيل المر عليه
==============
عشگتك من صغر سنك ويهلك
اليحبك ليش يتعذب ويهلك
أغار عليك من تمشي ويهلك
لچن ويه الغريب شلون بيه
==============
شدﮒ شلطم شنوحن شبچي آنه
على الغرب ضعنهم شبچي آنه
شباﭺ الناس صادت شبچي آنه
شما اذبه يرد فارغ عليه
==============
جيتك يالأحس إنك وناسي
ولجلك عفت كل ربعي وناسي
لگيتك شو تحب غيري وناسي
الگلب يهواك ماحطلك أذيه
==============
دحوك بثوب حسنك ونسج النه
بجهنم حبك ارضه وانسه جنه
انحبسنه بقفص عينك ونسجنه
وتحط رمشك كلبچات بإديه
==============
تعالوا لعلتي وشوفوا دواها
نار التسعر بگلبي دواها
طبيب الناس چنت أوصف دواها
وهسه آنه المريض شلون بيه
==============
نخيت المصطفى الهادي واهل بيت
گلت هلبت گعد حظي وهلبت
فرد بت البقه بروحي وهلبت
دخيل الله بگطعته شلون بيه
==============
بس مني التريده يصير بالفور
طفيلي وأدري بيك تموت بالفور
يهودي ومن تواعد وعد بالفور
توصل للصدﮒ تگلب عليه
==============
بعسر غير النوايب فاتحتمن
وسهم غدرك بگلبي فاتحتمن
اكتلتني وجاي تنشد فاتحتمن
ولاچنك رحت جناز بيه
==============
چثير الهم على گلبي تراكم
وگصيتو اوياي ياحبابي تراكم
تود العين كل لحظة تراكم
ولو بالطيف مرتكم عليه
==============
تتلني الروح مره و مره اتلها
وچثيرة ايام سوده مرت الها
روحي همر تاهت من رتلها
تعال وصير عبوة وطگ عليه
==============
ألف وسفة الدهر عنك بعدني
أموتن وارتجي لوصلك بعدني
تراني اوياك عالعشرة بعدني
وتراك انته النفس والروح بيه
==============
لحد الموت احبنك واريدك
وعسه دمي دخل يسمر وريدك
حياتي وموتي يمدلل وره ايدك
أرد أحيى وترد الموت اليه
==============
بعد حداد ماصيرن ولاسن
وحقي من ارفعن صوتي ولاسن
انطو جوز للمامش ولاسن
وثريد انطو لابو اسنون القويه
==============
بعدكم تارك بگلبي ورم شاك
علاجي بنظرة عيونك ورمشك
أحبنك وحب أمشي ورمشاك
وصلتك بعد خل نمشي سويه
==============
يدنيه شبيچ بس اوياي صحتي
عليه الضيم فوﮒ الحزن صحتي
ينشدني صديجي شلون صحتي
شجاوب وآنه كل الضيم بيه
==============
لاراهب عرف علتي ولاقس
ولا ليلى ابتلت مثلي ولاقيس
بعد ما أحسب لهجرك ولاقيس
رضيت شما يجي منك عليه
==============
الفرح لمن گربلي ياب اذية
ومحبتك يابه بلوه يابه اذية
شوصفك ياقصيدة يابذية
إذا حتى القفل عاصي عليه
==============
اعله دربك بعد لاروحن ولارد
واظل ساكت لون تحچي ولارد
أريد الحزن والدمعة ولاريد
الأخو البذات طبعة وخان بيه
==============
على گلبي محامي وكليته
اعله كيفك ويه چبدي وك كليته
صديجي بهاي اديه وكليته
رفس ماعون زادي وخان بيه
==============
الدهر ما شلي كل الگلب شل تك
وگلتلك ماتفيدك هاي شلتك
تذكر من طحت مو بدي شلتك
اشمالك من طحت ماجيت اليه
==============
گضيت العمر بس اقبلك ورضاك
وصرت بين السمه يفلان ورضاك
ضعت بين الزعل والعتب ورضاك
وادور گمت هسه آنه عليه
==============
غصب أنزل دمع عيني وسيله
لأن مالي على اوصالك وسيله
دهاك أخذ الگلب بيدك وسيله
يخبرك بالجره منك عليه
==============
حبيبي وچالنجم ويلوح بسماي
أذوبن من اسمعه ايصيح بسماي
عجب ياعين شو تبچين بس ماي
إبچي ادموم عالراح امن اديه
==============
فرق بين اليذوب بساع والصاك
وتذكر بيش اخوك اليوم وصاك
أسميك العلم مرات والصاك
وواجب للعلم ناخذ تحيه
==============
كاروك آنه يمك وانته هزني
مثل فرصة واجيتك ونتهزني
أنه شجرة بحياتك وانتهزني
أمطرلك عشگ بثنين اديه
==============
جمالك زاد عن يوسف وقبله
وحبك صار الي معبد وقبله
أحبك من زمن عيسى وقبله
وحبك صار دين ومرجعيه
==============
وگع گلبي بغرامك ماتشيله
وتره گلبي التعذب مات شيله
أخابر وإنته تسمع ماتشيله
وينك ياحلو بس رد عليه
==============
الگلب عاف البشر كلهم ولك راد
مشه مسافر تذكركم ولك راد
عرب ما طيبوا علتي والاكراد
دواي انته يهل مبعد عليه
==============
وحق رموشك الحلوة وعينك
أنه البالشدة أوگفلك واعينك
لو بيدي أنصبنك واعينك
ملك تحكم على كل البريه
==============
قدر مكتوب حبك وانته قسمه
الواحد ماله ناتج من تقسمه
لون بسيوف گلبي من تقسمه
تشوف معزتك شمسويه بيه
==============
أظل طول العمر صابر ولامل
وابد ماجوز عن دربك ولامل
بكنوز الأرض مابدلك ولامال
وغيرك ماأريد اخ إليه
==============
أصيل انته ومضيفك دوم ينضاف
وگلبي من الألم ياريت ينضاف
كون العمر فوﮒ العمر ينضاف
إلك مني العمر كله هديه
==============
الأحبه روحي بروحه مذابة
زعل وياي لو أدري ماذا به
ذبني بلا سبب وآنه مذابه
هجرني وصاح حبك بس اذيه
==============
أريد انصب عزه لروحي واقيمه
لأن مابقت حيثية وقيمة
الناس اتچلب بعنبر وقيمة
وانه مرگة هوى تصعب عليه
==============
حيرة بياسجية امتدح واصفه
أنقه امن الذهب والماس واصفه
واعله امن الوصف والمدح واصفه
بكل خصلة حرت وبكل سجيه
==============
حبيبي ومهجتي ودنياي وانته
تره المالوم صعب اهواي ونته
يصاحب تاه مني الگلب وانته
بس لو صادفك تلگاه اليه
==============
كسر ابراحتك بالگلب وفطر
ضلوعك ماأرضهن يوم وافطر
أصوم آنه اعله وجه الله وافطر
إذا ظلك خطفني ومر عليه
==============
على فراگك بچيت بدمع من دم
وعلى تعبي التعبته اوياك مندم
جرحك داخل الدلال مندم
لحد هسه تجي منه الأذيه
==============
بره المسگوم من علته وناداي
وحرگت اليابس بهجرك وناداي
براس اربع طرق لگعد وناداي
أنه المظلوم وانته ابعدت بيه
==============
يحادي الظعن بالله اعليك أني
لما يسمع شريچ الروح أني
لريد اصبر واعلم الصبر أني
أمر امن الصبر فرگاك اليه
==============
الهجر يكتل يصاحب وانته داري
عليك يخاف گلبي وانته داري
إنته اهلي وعمامي وانته داري
إنته امي وابويه وأخ اليه
==============
يهالروحك على الطيبات تربه
وعلى دربك تظل العين تربه
يريت اگعد على مصلاك تربه
وابوسك من تحط گصتك عليه
==============
حبك شامة بخدودي ودگة
واحط بالگلب بسمارك وادگه
اشچم دگة شفت منك ودگة
ورغم كل هذا احبك مو بديه
==============
نشدت الناس عنك وانته هينه
وعلى فراگك تلفنه وانتهينه
گلبي انته التعذبه وانته هينه
ويظل اسمك حلو وغالي عليه
==============
صحيح بعيد بس گلبي شعر بيك
حزين وباقي بس يكتب شعر بيك
عجب لي هسه باقي اسود شعر بيك
وانه بفرگاك ماظل شعر بيه
==============
يجن بيه المصايب مايجن بيك
وعسه الجنبك عني مايجنبيك
شلون تريد طالب مايجن بيك
إذا الأستاذ ياخذلك تحيه
==============
سكر كاس الخمر من ضاﮒ نفسك
واكو غيرك حلو بس ماكو نفسك
أريدك ياحبيبي تبوس نفسك
بس بداخلك تنويها اليه
==============
صرت دم المشه بداخل وريدك
ومثل متريد مشيني وريدك
فراگك حيل مرمرني واريدك
على جروحي تدوس بلا خطيه
==============
گلبي ايموت بس اوياك يحيى
ويظل سهران طول الليل يحيى
صرتيلي لميس وصرت يحيى
طلعلي منين تيم وعم عليه
==============
جرح البيه كافيني وزايد
واظل للموت احبنكم وازايد
بمزاد الحب أريد اگعد وازايد
واگولن هذا حبك بس اليه
==============
اكتبلي شما ردت تكتب واردلك
بساتين بوسط گلبي ورد لك
أروحن وابتعد وازعل واردلك
لأن الگلب بيدك مو بديه
==============
سابيني بجماله وطول شعره
واموتن لو سمعت ابيات شعره
أنه بيني وبين الموت شعرة
دشوفو وينه خل يلحگ عليه
==============
دمعتي اربع مناشف منشفتها
شفتها وخذت روحي من شفتها
لزمتها وخذت مصة من شفتها
بتت صبحت واشفافي نديه
==============
بهجرك صفه بيتي دار ميات
وعندي من القصر والدار ميات
حبيبي شكثر ادزلك دارميات
ومنك ماشفت بس ابوذيه
==============
ربك لليريده باب هدله
وانه دشداشتي امن الزيج هدله
الچلب لو شاف اخوه انوله هدله
وانه اخواني اصبحوا عدوان اليه
==============
علي گالوا شمالك بستغني
من الموال بسك بسته غني
كافي بعد إسكت بس تغني
أنه انجنيت مايدرون بيه
==============
يصاحب لاتظن مسرور بعداك
وعسه سم الزهر يندار بعداك
شيطفي الگلب من نار بعدك
يطفيها الوكت من ترد ليه
==============
صرت سمچة عليمن جاى شراد
أرد بالگلب لكن حيف شراد
تدرى انته بعشرتي اوياك شراد
صبر أيوب ما يلحگ عليه
==============
تره المكتوب يسمر مو بدينه
وعليكم دمع صافي مو بدينه
تگول احنه انتهينه مو بدينه
ونهايتنه غفل صارت سويه
==============
ذهب گالوا عليك شلون فضة
وگلبك يالحلو وياي فضه
حچي العذال لا تطريه فضه
وعوف الگال والگالوا عليه
==============
انحكمت بهوه حبك صرت مسجون
نمسج دوم إلكم ماتمسجون
ودوني الطبيب وگال مس جن
ويروح الجني من اترد عليه
==============
أفرمت گلبي منك والغي رامه
واشيل العشگ منه والغرامة
وعليك افرض ضريبة والغرامة
چي ناسيني ماتسأل عليه
==============
بهجرك راح عگلي مالفاني
وچثير اشعار لجلك مالفاني
رحت أركض بهيمة مالفاني
أدور اعليك يالرحت امن اديه
==============
مرضه بحبك وحبك شفانه
تسامرنه ولا واحد شفانه
تذكر يوم من طبگن شفانه
أحس ارض وسمه انطبگن سويه
==============
رمح جارح وكتنه خله بينه
ثبتنه وعيب بانت خله بينه
طبع إحنه من ابونا خله بينه
نبيع ارواحنه ونحمي الخويه
==============
على سنيني الدهر بدموع خطك
واگصن رجلي لمن تجزي خطك
شو آنه أتصل مشغول خطك
أثاري اثنينه نخابر سويه
==============
تهزهز ياگبر وانفض ترابيك
عزيز الروح هالنايم ترابيك
إجاني العيد وعيوني ترابيك
إنهض لاتشمت اعداي بيه
==============
اهمومي ماتعداها ارقام ونمر
متى نگدر نفوت اعليك ونمر
دليلي اعله المصايب صلف ونمر
يضحك والدهر محرب عليه
==============
يباري المرض هد حيلي وهدني
ولا يوم ابتعد عني وهدني
ارشدني لرحمتك يارب وهدني
طريح افراش والعلة خفيه
==============
شوف اشسال من جرحي وشده
وعلي تصعب مداواته وشده
نخيت اشچم خوي بهمة وشدة
يصير اصعب من اعدائي عليه
==============
رضيت بزينك وشينك وعابيك
وگلبي ما وعه بغيرك وعابيك
أشور بيك تدريني وعابيك
لون چانك تريد تخون بيه
==============
وحگ اهل الوفه والملح والزاد
الكرم أفضل معاني الشيم والزاد
حلالي مايهمني النقص والزاد
تهمني الناس شتسولف عليه
==============
نص احترﮒ من هجرك ونص طاف
وغرﮒ نصي ابحر حبك ونص طاف
يريت المدرسة ترجع ونصطف
وابدلك بالعلم وآخذ تحية
==============
شخص البادلك بالطيب رده
مو تجفي وتروح بغير رده
شافاني وركض للباب رده
جزات الطيب رد بابه عليه
==============
أخذ گلبي إذا ذابت دلالك
من نار العشگ يسلم دلالك
أحب إسمك لحن همسك دلالك
واحبك حته من تقسي عليه
==============
أبيع احزان تالي الليل من راد
وسؤالي اللي طرحته اليوم من رد
ليش الطيب ويه الناس منراد
لأن مايمتلك ذرة أذيه
==============
تناديني واگلك هسه اجاني
وگبل للحزن راغب هسه جاني
چنت محتاجه مامر هسه اجاني
من طاح بعسر مد ايده ليه
==============
أبشرك مابعد بالعين ضل ماي
واحس حته الصبح بجفاك ضلماي
زماني مرادف اعله الروح ضلماي
سلب عگلي وشدهني وشد اديه
==============
أگطع من خدودك ورد واشتم
ولا أدري شبقه امن العمر وشتم
أرخصك ولك سبني حيل وشتم
شتايمكم ثواب لوالديه
==============
يطارش هاك مكتوبي وسر بيه
حنين الگلب بسطوره وسر بيه
إخبره شوكت نتلاگه وسر بيه
وعلى كل بيت اطشن واهليه
==============
يبو اليمه وحگ مسلم وهاني
أحبك لاتظن حبك وهاني
بالمحشر سعيد آنه وهاني
شفيعي انته يبن سيد البريه
==============
بحب حسين شرد اوصف وشملي
إسمه موسم بگلبي وشم لي
بالمحشر لون شمله وشملي
انجمع واشكيله حبه اشعمل بيه
==============
اعتنيتك يوم ضكني الدهر عناي
گاصد گبتك يحسين عناي
حاشه تگصر انته بيوم عناي
وانه برجواك دنيه وآخريه
==============
حبك بالضلع بسمار مندﮒ
واحس گلبي يسولف بيك من دﮒ
گمت أركض على النقال من دﮒ
لأن أدري العزيز اتصل بيه
==============
ذبت وبشوﮒ شخصك مايع آني
ويعاني الگلب منك مايعاني
لون تعطش سگيتك ماي عيني
والك روحي لقدمها هديه
==============
بنار الهجر صدﮒ مايع آني
ونشف من كثر دمعي ماي عيني
تريد اتشوف گلبي ومايعاني
مد ايدك جهنم تلگه بيه
==============
صرت مرهون حبك وانته راهن
وعليه ايام هجرك ون تراهن
تجي مرة انتواجه وانتراهن
منو الأكثر يحب ويود اخيه
==============
أبد مايرحم الطايح وكتنه
جمعنه ورجع طشرنه وكتنه
أصيح اعله الفرح اوگف وكتنه
تركني وماسمعني ورد عليه
==============
وگف وكت الهوه بينه ولادار
ونشف فرع العشگ يسمر ولادر
يتامه ولا وطن لمنه ولادار
عگبكم والدمع هم شح عليه
==============
من هجرك بقه الدلال بس تك
لاتلعب على الحبلين بس تك
أمس بالحلم مدري منين بستك
لأن كلك حلو وتاهت عليه
==============
وحگ رصعة خدودك وحگ شفتك
انسبيت بيوم وسط الخلگ شفتك
اشيخلصني بعد شرتاح شفتك
تبعد تقترب نفس الأذيه
==============
ذبل هرش الگلب لجلك وخاوة
وطمع ما اريد من عندك وخاوة
الفضل مو للذي عاشر وخاوة
الفضل والطيب لليذكر خويه
==============
وحگ اللي خلق بالكون آلاء
مثل عين الغزالة عيون آلاء
أمد ايدي عليها اتگول اوه لاء
تأدب لاتمد ايدك عليه
==============
عليك الليل كله آنه وآنه
ومعاك العتب هسه آن اوانه
اتهدد بالنفاهة آنه وآنه
وينك مو طبگ دهري عليه
==============
روحي اوياك ما أگطع وصلها
وتفرح لو خبر منك وصلها
نسبها دورت عنه وأصلها
لگيته ايعود الك ميعود اليه
==============
إلك دمعي الحبسته والجريته
والك كل العملته والجريته
والك عمري شعلته وجريته
حته اشويلك اسنيني بديه
==============
أحس من يون گلبك ونته عدي
أريد العمر يخلص وانته عدي
جسمي بساط افرشه وانته عدي
هلبت تعثر وتوگع عليه
==============
ترف ياللي بطريج الهجر ماشيت
عجب بجفاك عني العگل ماشيت
عاندني وتدلل واخذ ماشيت
بس لاتبخل بوصلك عليه
==============
راء وعين الك مني ودالي
وامس مكتوب محبوبي ودالي
گمت أسمع حسام آنه ودالي
لأن عاشگ بنات الناصرية
==============
حديقة بعلم رب الكون ضليت
وعن درب العلم ياناس ضليت
شجرة وبس عله العاوين ضليت
وصرت سايق مخدة وجودليه
==============
إله اسنين الفرح وياي مايه
ومو واحد جروح الگلب مايه
اليغص ابلگمه اذا ينطوه مايه
وانه بالماي اغص وشلون بيه
==============
وحگ من كون الأكوان وابسط
أنه اسهل من نسيم الريح وابسط
چنت املك مخدة صوب وابسط
الإجوني فرهدوا ذني من اديه
==============
سنة دمعي مله جفوني سناسل
وسنة مجنون خلاني وسناسل
وسنة بحبال چتفني وسناسل
وسنة هدني وگعد يضحك عليه
==============
شفت بالطيف شخصك سالماني
همت ودموع عيني سالماني
علي تسأل يصاحب سالم آني
عزيز وشوفتك شحت عليه
==============
يكاس العمر ماظلت وشل بيك
ويجرحي لشوكت تنزف وشل بيك
تگلي ليش متمرمر وشل بيك
تهت منهو اليدليني عليه
==============
عيونك صيف مامرهن شتلهن
ومصايب شوگك بگلبي شتلهن
تگلي إسحب اهمومك شتلهن
حيل ثگال راوني المنيه
==============
گبل عنگود خدك يمي داني
صطيت وجفن عينك يمي داني
أغم گصتي واصيحن يمداني
يمي وماخذت ثاري بديه
==============
تسعر نار گلبي منكبره
ولافد يوم افكر منك ابره
آنه الخيط مني ومنك ابره
واخيط شفتي وشفتك سويه
==============
هلي اوياهم چنت عايش بلا هم
ونهاري شما ضوه مظلم بلاهم
هلي مدري الوكت شنهو بلاهم
ولا همه اعرفوا بالصار بيه
==============
هواكم أثر بعگلي وداره
ومنو مثلي الچ وفه وداره
سمعت بقيس عاف اهله وداره
عليكم ماحمل مثلي أذيه
==============
وحگ حيدر شديد العزم والياس
زرعت ادروبكم بالورد والياس
منكم ماگطعت الرجه والياس
اعزاز وتصعب الفرگة عليه
==============
محد حل لغز حبك حلالي
وغيرك بالبشر لتظن حلالي
نذر لو صار لبالي حلالي
أجيب اعيوني اطشهن واهليه
==============
نبيع الروح للينشد علينه
وصبح ثوب الحزن لايگ علينه
وحگ عباس والحمزة وعلينه
نظل ننشد عليكم للمنيه
==============
دمع عيني بغيابك بره سايل
وعليك الگلب يطلع بره سايل
ماينفع غزلنه بالرسايل
أريد الغزل وانته ابين اديه
==============
صديقي الماخذ بشوره ورايه
أثاري يطعن بضهري ورايه
علگ لافته بضيجي ورايه
واشوفه بلا خجل يضحك عليه
==============
الزعل بينك وبيني ابعيد خله
واحنه من الصبه ياصاح خله
تسدلي انته واسدلك دوم خله
وحچيهم عم عليك وعم عليه
==============
عليك الروح تنشد ماتمرها
وامرها مو بديها مات امرها
عليك اليوم نعقد مؤتمرها
ونحدد جدوله بموعد الجيه
==============
صرت انته سوالفنه وحچينه
وعليك بخير صدگني حچينه
حبيبي ارجوك جاوبنه حچينه
من تزعل تضيج الروح بيه
==============
أريد الياس منك ياسه ياسه
وهذا الگلب صدﮒ ياسه ياسه
ردت تحچي بسياسة ياسياسة
سايستك گبل دگيت بيه