شاعر الحب :محمد رحيمة الطائى

أذا ما احبج انتي شلون احب الناس
يا أول غرام بصغري وبكبري
وأذا ما شوفج انتي شلون اشوف الناس
وانه بغير شوفج يقصر نظري
حبيتج سهر وايامي غابت ليل
وبس وياج اسهر يابعد عمري
أذا مو الج اكتب ما احس بشوك
وانه علمودج اكتب بشعري
جربتج هواي وشفتج اوفى الناس
يا أول حبيبه تحملت قهري
دسأليني بحياتي شكد تمر نسوان
ليش بس انتي الباقيه بفكري
وسأليني بحياتي شبيها من هموم
وليش من أشوفج يطفه كل جمري
يااجمل محطه البيها كلبي ارتاح
يا نهر الحنان وبالكلب يجري
تغفه عيون يا ما وياما نامت ناس
وانه ويه الاشواك وملتهي بسهري
اقرب من اشوفج واحترك مرات
احس مني بعيده ويختنك صدري
ويمر طيفج هوى واحتار اشمه منين
وشاكو يا عمري احلى من الهوى العذري
وتسأليني احبج اي نعم والله
بس ليش انه احبج صدكيني ما ادري



شاعر الحب : محمد رحيمة الطائي