جبتها امكازر

جبتها أمكازر

----------------------

جبتها أمكازر أويه الأه والحسرات - جرح ياكل جرح عيد الفرح صمته

على شباج ليلي ألف حسبه إتفوت - أجاسمها الدمع وأشجيلها الشفته

أطك شخرة وسافه ماحسبت الراح - عفه ليل الشته مافرزنت عفته

ترس نكلات جدمي حجي أهواي إنكال - إبثوب المستحه محجاي شيمته

جنت أدري الصبر للفرج صب مفتاح - إصبرت حتى الفرج بالحلم ماشفته

مفتاح الفرج بيد الصبر من ضاع - دولبني الزمان أوصرت سالفته

عسل عثكي يبز إبحلك مابي ذوق – أوساوه العسل والحنضل إبذائقته

حيرني أوكلت بيه الأيام إتعود - ويرد لي اويكلي أشكد عزيز أنته

نكرعشرة أسنين أكبرإمن العشرين – عمت عين الزمان إشضيقه دائرته

حاولت أشتريه بأغله ثمن لوراد – شراكه أويه النفس من وكت ثمنته

لجن شك مستحاه أووشل النكاط - أوماظلت وشاله إبكصته لليمته

كلشي ارضيت منه أو كتله لا لتروح – لأن كل ذكرياتي أمس أمنته

لأن عمري أوحياتي أومكاتيب الحب – والكلشي إعله كلشي إبأيدي سلمته

يهه ياهم زماني الصار عرفه أوياي – يلاكيني إبشماته إيكلي جفلته

يكلي الجان يحلم تمر طاري إعليه – صارإيشوفك إنته إيكول تيهته

رضيت أوكتله أفرش أنه أمشي إعليك – أوخلينه إنتفاهم يلتفت ردته

أوحشمت السلف والوفه أوجف الخير – وأشليلي فرشته إحصير سالفته

أوجبت ملحة العشره أوجنح عمر الشوك – وإبخبزة عشكنه الفات حلفته

ماجنه كضينه إسنين عمر إجبال – نبني عش سعاده إزغيرمن يمته

أوكبر عشنه السعيد أوصار اجمل بيت – شبابيجه الفرح بيبانه البسته

أو لمن ردنه نعيد جبت هم عاشور – شنهي السالفه ياجرح حضرته

ياهو الوش بأذانك حايف الناطور – لوعود المحبه البيدك إشتلته

لومسحة جمالك غدت تنفخ بيك - ليغرك جمالك أنته مو فلته

عبر عمرك مسافه رخص بيها السوم – متحصل جذب مثلي الرضه إبذلته

ولك اخر كلامي ترد لو أنساك - وابيعك لأبو خشاله إبلا ثمن سكته

أوبالمريخ أدفن كل هوانه الفات – وأخنك كل هوه أيذكرني بالبعته

-----------------------

الأربعاء:6/جمادي الأخره/1434هـ , المصادف:17/4/2013م

النجف الأشرف